Duapulo ket uppat a Filipino ti indeportar ti gobierno ti Estados Unidos gapu iti mapapati a kriminal nga aktibidadda, segun ken ni Ambassador ti Filipinas iti Estados Unidos Jose Manuel Romualdez.
Kinuna ni Romualdez, iti maysa nga interbiu iti radio, a saan met a nadagsen ti krimen dagiti naideportar ngem napapanawda ta nairamanda kadagiti kriminal nga aktibidad.
Ingganetget met ti ambassador a di koma pagamkan ti situasiond dagiti imigrante a Filipino iti US ta segun kenkuana, pagtalinaeden ken tulongan dagiti employer dagiti empleadoda a Filipino tapno magun-odda ti legal a kasasaadda.
"Dakkel a namnamada dayta. Dagiti met adda ditoyen, agtrabtrabahoda met ken agbaybayadda met iti buis ket dakkel ti tiansada a magun-odda ti legal status-da aglalo no isponsoran ida dagiti employer-da," kinuna ni Romualdez.
Kasaritanto ni Marcos ni Trump maipanggep kadagiti annuroten ti US a makaapektar iti PH
Immunan a kinuna ni Romualdez nga ipangruna ti gobierno ti US ti pannakaideportar dagiti addaan iti rekord ti krimen, kasta met dagiti naproseson a maideportar a 1.3 a milion nga imigrante.
Binalakadanna dagiti Filipino iti Amerika nga awanan iti "ania man a kita ti status" a boluntario nga agsubli iti Filipinas wenno rugiandan nga ipagna dagiti dokumentoda ket saanda nga urayenen a maideportarda.
Binagaan met ti Department of Foreign Affairs (DFA) dagiti undocumented ken overstaying a Filipino iti US nga agtalinaedda laeng a di nakadidillaw ken nasken a trabahuenda ti pannaka-legal ti panagyanda iti US ta ing-ingetan ngaruden ti administrasion ni Trump dagiti annuroten ti imigrasion.
Iti Saturday News Forum iti Quezon City, kinuna ni Foreign Affairs Undersecretary Eduardo Jose De Vega nga asistiran ti DFA dagiti Filipino nga agpatulong iti Philippine Embassy wenno kadagiti konsulado iti US.
Kinuna ni De Vega nga amin a Filipino nga adda iti US, uray pay undocumented, ket nagbiahe iti US nga addaan ikutda a visa.
“Amin dagita, adda visa-da. Mabalin a nag-expire laeng. Awan met ti immay ditoy nga awanan uray maysa laeng a dokumento," kinunana.
Segun pay ken ni De Vega, kasla imposible a maideportar amin dagiti mapattapatta a 300,000 a Filipino nga awanan iti legal status iti US agingga iti panagngudo ti administrasion ni Trump.
Impasingkedna met a sisasagana ti gobierno ti Filipinas nga agtignay no maapektaran dagiti Filipino iti plano ti gobierno ti US a mass deportation.
Nalaka laeng a mapaggunay ti gobierno ti pondo ti DFA Assistance-to-Nationals, kinuna ni De Vega.
Innayopnna nga adda pay ti Aksyon (Agarang Kalinga iti Saklolo para sa mga OFW na Nangangailangan) Fund ti Department of Migrant Workers (DMW) a maus-usar para iti legal, medikal, pinansial, ken dadduma pay a porma ti tulong para kadagiti overseas Filipino worker, kas iti repatriation ken intervention tapno maprotektaran karbengan dagiti Filipino. (Betheena Unite/MANILA BULLETIN/PNA)
