Iti baet ti panagamak a maisardeng ti tulong ti Estados Unidos (US) iti Filipinas gapu iti executive order nga impaulog ni Presidente ti US Donald Trump, kinuna ni Jose Manuel “Babe” Romualdez, Embahador ti Filipinas iti Washington, idi kalman (Enero 26) a temporario laeng daytoy ken saan a makaapektar kadagiti katulagan a militar.
Iti maysa nga interbiu iti Super Radyo dzBB, impanamnama ni Romualdez a saan a nasken a pagdanagan ti posible nga epekto ti pammilin ni Trump a mangsuspenso dagiti amin a US foreign assistance programs tapno marepaso dagitoy no maitunos met laeng iti foreign policies ni Trump.
Kinuna ni Romualdez a dagiti tulong militar nga ipapaay ti US iti Filipinas ket saan a maibilang nga "aid" ta paset daytoy ti operasion ti militar ti US, kas iti Enhanced Defense Cooperation Agreement (EDCA).
Ti kadakkelan a tulong a maal-ala ti Filipinas manipud iti US ket mainaig iti depensa militar- ti AFP modernization program ken dagiti operasion kadagiti EDCA sites.
Kasaritanto ni Marcos ni Trump maipanggep kadagiti annuroten ti US a makaapektar iti PH
Inlawlawag ni Romualdez a dagiti dadduma a tulong pinansial ken humanitarian assistance a kas iti Acquired Immunodeficiency Syndrome-Human Immunodeficiency Virus (AIDS-HIV), climate change, ken United States Agency for International Development (USAID) ti maapektaran, ta adalen ti gobierno ti US no makatulong dagitoy iti foreign policy-da.
Ngem impaganetget ni Romualdez a "temporario" laeng dagitoy.
Iti Indo-Pacific region, ti Filipinas ti kadakkelan ti maal-ala a tulong militar manipud iti US, nga agdagupen iti nasurok a US$1.14 a bilion iti para militar a ramit ken panagsanay manipud idi 2015 agingga iti 2022.
Innayon ni Romualdez a nainget ni Trump no maipapan kadagiti tulong ti US kadagiti ganggannaet a pagilian, ket impaganetgetna a kasapulan a siguraduen a ti ania man a tulong nga ipaay ti US ket maitunos iti interes ken prinsipio ti Amerika. (Raymund Antonio/Manila Bulletin//Lito Hilidon/Bannawag)
