Gapu iti yaadu dagiti Filipino a naynay a sumarsarungkar wenno agbuybuya iti pornograpiko a website a Pornhub, nakuna ni Kabataan Party-list Rep. Raoul Manuel a "nakadadanag la unay" daytoy ta dagiti kakastoy nga online content, mabalin a mangyaw-awan kadagiti agtutubo maipapan iti panangbukel iti pannakirelasion.
Imbatad daytoy ni Manuel, kameng ti militante a Makabayan bloc iti Kamara, bayat ti briefing nga inangay ti House Committee on Basic Education and Culture maipapan iti kontrobersial a comprehensive sexuality education (CSE) ti Department of Education (DepEd).
Kabayatan ti interpelasionna kadagiti timmabuno nga opisial ti DepEd iti hearing, nangibinglay ni Manuel iti trivia maipapan iti online behavior dagiti Filipino.
"Ngamin ket agdadanagak ta uray no saan a datayo ti top one nga agus-usar iti Pornhub, ti Filipinas ti number two sipud pay idi Disiembre 2023," kinunana.
Malakanyang, saan pay a makapagkomento iti petision kontra iti 2025 national budget
"Kas maysa a pannakabagi dagiti agtutubo, siempre madanagantayo no kastoy gayam ti kasaknap ti panagusar iti pornograpia wenno panagbuya iti kakastoy a tipo ti content iti pagiliantayo, a mabalin a makaigapu daytoy iti pannakatikaw dagiti agtutubo no kasano ti umno a pannakirelasion," kinuna ti 30-anios a diputado ti Kabataab Party-list.
Manipud idi Agosto 2024, ti Pornhub, maysa a Canadian a company, ti maika-16 a website a kaaduan ti mangsarsarungkar iti sangalubongan ken ti numero uno a mapagbuybuyaan nga adult website. (Ellson Quismorio/MB)
