Indagadag ti maysa a grupo dagit mannursuro ita nga aldaw, Enero 27, ti natimbeng ken konsultatibo a pannakataming ti singasing a Comprehensive Sexuality Education (CSE) program ken ti agdama a pannakaipatungpal daytoy iti sidong ti Department of Education (DepEd).
Kinuna ni Benjo Basas, National Chairperson ti Teachers’ Dignity Coalition (TDC), a bigbigenda ti kinapateg ti pannakaisuro dagiti ubbing kadagitoy a topiko a maitutop iti edad ken panagdakkelda, ngem masapul a maaramid daytoy a siaannad ken buyogen ti naan-anay a panagsagana.
Naikeddeng a maaramid ti pannakabista ti CSE iti Committee on Basic Education ti Kamara.
Segun iti TDC masapul a mairaman ti umno a material, ken kangrunaan ti nainget a panangsanay kadagiti mannursuro a mangtaming kadagiti leksion.
Kasaritanto ni Marcos ni Trump maipanggep kadagiti annuroten ti US a makaapektar iti PH
Pinasingkedan ni Basas ti panangsuporta ti TDC iti CSE program ket inawisda dagiti kritiko nga adalenda a naimbag ti linaon ti program sakbay a mangbukelda iti konklusion.
Kinuna ni Basas a dagiti dadduma a panangbabalaw ket nagtaud iti nalabes a pannangipapan a saan a mangipakita iti umisu a linaon ti singasing a paglintegan, wenno ti agdama a programa ti DepEd.
Kinuna ti TDC a naisayangkat ti bista tapno matingiting dagiti detalye ti CSE ken mataming dagiti pakaseknan ti nadumaduma a sektor, agraman dagiti mangitantandudop iti edukasion, gunglo dagiti nagannak, ken grupo ti relihion. (Merlina Hernando-Malipot/Manila Bulletin//Lito Hilidon/Bannawag)
