Imbilin ti korte ti Muntinlupa ken ni Darryl Yap nga ikkatenna ti teaser video ti kontrobersial a pelikulana a “The Rapists of Pepsi Paloma.”
Impaulog ni Presiding Judge Liezel Aquiatan ti Muntinlupa Regional Trial Court (RTC) Branch 205 daytoy a pammilin idi Enero 24.
Naitampok iti “The Rapists of Pepsi Paloma” da Rhed Bustamante (kas Pepsi Paloma), Gina Alajar (kas Charito Solis), Mon Confiado (kas Rey Dela Cruz a manager ni Paloma), Rosanna Roces (kas Divina Valencia), Andres Balano Jr. (kas Richie D'Horsie), Shamaine Buencamino (kas Lydia Duena Whitley nga ina ni Paloma), Jun Nayra (kas Renato Cayetano nga abogado ni Paloma), ken Beverly Salviejo (kas Monica, maysa a talent scout).
Maysa a paset laeng ti pinatgan ti korte iti kiddaw ni Vic Sotto a writ of habeas of data.
Kasaritanto ni Marcos ni Trump maipanggep kadagiti annuroten ti US a makaapektar iti PH
Iti desision ti korte, binilinna ni Yap nga ikkatenna ti 26-segundo a teaser video manipud kadagiti online platform, social media, ken ania man a wagas ti panagiwarnak. Ngem saan a dinakamat ti korte ti sibubukel a rason ti pannakaikkat ti teaser video ti pelikula, malaksid iti makunkuna a "misuse of data of unverifiable origin."
Nupay kasta, pinalubosan ti korte a mairuar ti pelikula ni Pepsi Paloma, ta kuna ti korte a dina mabalin a lapdan ti entero a pelikula, ta naibatay dayta iti pakasaritaan ti biag ni Pepsi Paloma a nakaalaan ni Yap iti pammalubos ti ina ken kabsatna, naadaw manipud iti publiko a rekord kas kadagiti newspaper clippings, footage, ken masalakniban daytoy babaen ti interes ti publiko ken artistic freedom.
Kinuna ti abogado ni Yap a ni Raymond Fortun a kiniddawna iti korte ti agtultuloy a pannakaipatungpal ti gag order nga impaulog daytoy. (Jonathan Hicap/Manila Bulletin//Lito Hilidon/Bannawag)
