Nagkita, ken nagkadua, met laengen dagiti agkabsat a gymnast a da Carlos Poquiz Yulo ken Karl Eldrew Poquiz Yulo kalpasan ti adu a naipadpadamag a di panagkikinnaawatan ti pamiliada.
Nagsarak dagiti dua a Yulo iti San Miguel Corporation-Philippine Sportswriters Association (PSA) Awards Night a naangay iti Manila Hotel idi Lunes, Enero 27.
Napadayawan ni Carlos, a nakayalat iti dua a balitok a medalia iti Paris Olympics, a kas 2024 Athlete of the Year.
Nabigbig ni Eldrew gapu iti panangyalatna iti adu a medalia a kaaduanna ti balitok kadagiti internasional a dinnayo iti gymnastics a kas iti panangabakna iti balitok a medalia iti Asian Artistic Gymnastics Championships Junior Category a naangay iti Tashkent, Uzbekistan idi Mayo 2024). (Philippine News Agency)
