Asidegen a maaprobaran iti Kamara ti gakat a mangpaatiddog iti termino dagiti opisial ti Barangay ken Sangguniang Kabataan (SK) manipud iti tallo a tawen nga agbalin nga innem a tawen.
Naanamongan iti maikadua a pannakabasa iti plenario itay Enero 27 ti House Bill (HB) No.11287, wenno ti singasing nga "Act fixing the term of office of Barangay and Sangguniang Kabataan officials and changing the term of office from three years to six years."
Naisingasing pay a mayakar ti naikeddeng a sumaruno a Barangay and Sangguniang Kabataan Elections (BSKE) inton maikadua a Lunes ti Mayo 2029.
Addan gundaway ti Kamara a mangidatag iti maikatlo ken maudi a pannakabasa ti HB 11287 sakbay ti naituding a recess ti Kongreso.
Kasaritanto ni Marcos ni Trump maipanggep kadagiti annuroten ti US a makaapektar iti PH
Ni House Speaker Martin Romualdez, ti kangrunaan a nangisurat iti HB 11287 a mangamendar iti Section 42 ken 43 ti Republic Act (RA) No.7160, wenno ti naamendaran a Local Government Code (LGC) of 1991.
Ipaay ti singasing a linteg ti dua a termino a limitasion ti mabotosan nga opisial ti Barangay ken maysa a termino kadagiti opisial ti SK.
Segun iti singasing, amin nga agdama nga opisial ti barangay ken SK a nabotosan idi Okt. 30, 2023 ket agtalinaed iti pagakmanda agingga inton sumaruno nga eleksion a maaramid inton Mayo 2029, malaksid no maikkat wenno masuspendeda. (Ellson Quismorio/Manila Bulletin//Lito Hilidon/Bannawag)
