Inanamongan ti 21 a Senador ti singasing a linteg a mangipaay iti libre a legal assistance kadagiti military and uniformed personnel (MUP) a naidarum gapu iti panagtungpalda kadagiti annongenda.
Naanamongan ti Senate Bill (SB) No. 2814 wenno ti singasing a Free Legal Assistance for Military and Uniformed Personnel Act, iti maikatlo ken maudi a pannakabasa itay Enero 27.
Maibatay iti SB 2814, maikkan ti libre a legal a tulong dagiti MUP kas kadagiti opisial ken enlisted uniformed personnel ti Armed Forces of the Philippines (AFP), Bureau of Fire Protection (BFP), Bureau of Jail Management and Penology (BJMP), Philippine Coast Guard (PCG), Bureau of Corrections (BuCor), Philippine National Police (PNP), ken ti Hydrography Branch ti National Mapping and Resource Information Authority (NAMRIA).
Mairaman met iti libre a legal assistance dagiti retirado ken honorably discharged and separated MUP.
Kasaritanto ni Marcos ni Trump maipanggep kadagiti annuroten ti US a makaapektar iti PH
Karaman kadagiti maipaay a legal a tulong ti legal representation iti kaso a sibil, kriminal, ken administratibo, legal advice wenno konsultasion, panangisagana iti pleading, motions, memoranda, ken amin a legal a porma ken dokumento, court fee ken dadduma pay a mainiag a babayadan, ken pannakanotario dagiti dokumento.
Kinuna ni Senate President Pro Tempore Jinggoy Ejercito Estrada a kalpasan a maanamongan ti SB 2814, namnamaenna nga ad-adda ti panagtalged dagiti pannakabalin ti linteg a mangkemmeg kadagiti kriminal ken mangrakrak kadagiti sindikato a dida agbuteng kadagiti posible a kaso a maipila maibusor kadakuada. (Hannah L. Torregoza/Manila Bulletin//Lito Hilidon/Bannawag)
