Mangnamnama ni Presidente Marcos a malawlawaganto maipanggep kadagiti di unay nakaaawat nga annuroten nga impaulog ni United States President Donald Trump inton agkitada iti nabiit pay a nagsapata a presidente ti Amerika.
Iti pannakiuman kenkuana dagiti agiwarwarnak bayat ti kaadda ni Marcos iti Cebu, inakona nga uray isuna, dina unay maawatan ti naireport a kinuna ni Trump a pannakaisardeng pay laeng dagiti tulong ti US kadagiti ganggannaet a pagilian.
Innayon ni Marcos nga adu dagiti rumbeng a pagsaritaanda ken Trump nangruna iti benneg ti negosio, depensa, seguridad, ken, kangrunaanna, iti annuroten ti administrasion ni Trump maipanggep iti imigrasion a nangibungan iti pannakaideportar ti sumagmamano a Filipino.
Ngem nupay addan dagiti plano iti panagsango da Marcos ken Trump, kinuna ni Presidential Communications Office (PCO) Secretary Cesar Chavez nga awan pay ti masnop a petsa no kano ti ibibisita ni Marcos iti Estados Unidos. (Raymund Antonio/ Manila Bulletin)
