Papardasen ni House Speaker Martin Romualdez ti pannakiuman ti Kamara mainaig iti singasing a panangingato iti sueldo dagiti mangmangged a Filipino iti PhP200.
Kinuna ni Romualdez a sangsangalen ti Kamara ti gakat a mangipangato iti sueldo a mangtaming iti kasapulan dagiti mangmangged ken mangtulong kadagiti negosio, nangruna dagiti MSMEs (micro, small, and medium enterprises), iti pannakaipatungpal daytoy.
Segun ken ni Romualdez, gapu iti agtultuloy a panagngina dagiti magatgatang, masapul a maipangato met ti sueldo dagiti mangmangged.
Impaganetget ni Romualdez a nasuroken a tallo a dekada ti naudi a pannakaipaulog ti linteg a mangipangato iti sueldo dagiti mangmangged, babaen ti Wage Rationalization Act of 1989, ket kinunana a naipangato idi ti sueldo a saan met a nangitunda iti nakaro nga implasion wenno nasaknap a panagserra dagiti negosio.
Kasaritanto ni Marcos ni Trump maipanggep kadagiti annuroten ti US a makaapektar iti PH
Kinuna ni Romualdez a no nabaelan ti Kamara nga ipaulog ti kastoy a linteg idi, awan ti makitana a rason no apay a saanda a kabaelan ita, nangruna no buyogen ti naannad a panagplano ken pannakitinnulong ti nadumaduma a sektor.
Inlawlawag ni Romualdez a makium-uman ti Kamara iti nadumaduma sektor kas iti gunglo dagiti mangmangged, employer, ekonomista ken dadduma pay a maseknan, ta masapul ti "win-win solution" a mangtimbeng iti interes dagiti mangmangged ken dagiti employer. (Ellson Quismorio/Manila Bulletin//Lito Hilidon/Bannawag)
