CARASI, Ilocos Norte – Rimsua ti puor iti kabambantayan a paset daytoy nga ili idi malem-kalman, Huebes, Enero 30. Nupay kasta, kinuna ti Bureau of Fire Protection-Ilocos Norte ita nga aldaw, Biernes, Enero 31, a “tengngeldan” ti nasao a puor iti kabambantayan a paset dagiti Barangay Barbaqueso (Poblasion), ken Virbira.
Kuna ti Department of Environment and Natural Resources-Ilocos Norte a mapan a 287 nga ektaria a paset ti kabambantayan ti naapektaran, a 50 nga ektaria ditoy ti paset ti National Greening Program ti DENR.
Tumultulong ti Carasi Police Station nga idauluan ni Police Capt. Janery Samoden ken ti 102nd Infantry Battalion iti BFP iti pannakaiddep ti puor.
Tumultulong pay ti Office of Civil Defense-Ilocos nga idauluan ni Director Laurence Mina iti pannakakontrol ti puor, agraman ti gobierno lokal ti Carasi nga idauluan ni Mayor Robella Gaspar.
Babai, pinaltogan ti nabartek a kaarruba, natay
Makikokoordinar ti OCD-Region 1 iti Tactical Operations Group-1 ken iti National Disaster Risk Reduction and Management Council iti pannakaideploy ti dua nga air assets (heli-bucket) iti kabambantayan ken sabali laeng ti maysa pay nga air asset a naka-standby.
Nangyestablisar met ti Municipal Disaster Risk Reduction and Management Council iti Incident Management Team a pagpaayan ni MDRRM Officer Marc Stanley Bulil-lit a kas incident commander.
Kuna dagiti autoridad a nasken a makontrol ti puor tapno saan a makadanon iti Bantay Lammin iti Piddig, Ilocos Norte a yan ti kadakkelan a plantasion ti kape iti Ilocos Region.
Ad-adalen pay laeng dagiti autoridad no ania ti nakaigapuan ti puor.
Masarakan ti Carasi 40 a kilometro iti daya ti Siudad ti Laoag a kabesera ti Ilocos Norte ken 524 a kilometro iti amianan ti Manila. (Liezle Basa Iñigo ken Martin Sadongdong/ Manila Bulletin)
