Agdagup iti 117 a Filipino nga empleado ti maysa a kompania nga agpapautang ti naarestar iti Siudad ti Makati gapu iti maipagarup a pannakairamanda iti abusado a wagas ti panagsingir iti utang.
Naiwayat ti operasion babaen ti nagdadanggay a puersa ti National Bureau of Investigation (NBI), Securities and Exchange Commission (SEC), ken ti Presidential Anti-Organized Crime Commission (PAOCC) itay Enero 31, iti bileg ti Warrant to Search, Seize, and Examine Computer Data (WSSECD) nga impaulog ni Atty. Karla Regina D. Valera ti Makati City Regional Trial Court (RTC) Branch 147.
Segun iti PAOCC, inwayatda ti operasion gapu iti panangipulong dagiti biktima ti online lending applications kadagiti abusado a wagas ti panagkolekta iti utang ken panagpautang dagiti lending company a nakautanganda.
Kinuna dagiti biktima a maburiboranda iti nakangatngato unay nga interes ken nalimed a bayadan nga ipataw ti nasao a lending company, isu a marigatanda nga agbayad.
Ania ti kapatgan kadagiti Filipino a botante?
Nakaawat pay ti dadduma kadakuada iti pangta a pannakapapatayda no maladaw ti panagbayadda iti uray maysa laeng nga aldaw. Nangipatulod pay ti lending company iti email kadagiti pagtrabahuan dagiti biktima, ket ibagbagana nga scammer daytoy.
Naipaskil pay ti rupa dagiti biktima iti Facebook ken mateksan dagiti kakabagianda a mangdagdag a bayadandan ti utangda.
Iti sabali a bangir, kinuna ti polisia a maidarum dagiti nakemmeg iti panaglabsing iti Data Privacy Act, unauthorized processing of personal information, cyber libel, harassment, ken grave threats. (Richielyn Canlas/Manila Bulletin//Lito Hilidon/Bannawag)
