Iti commissioned survey nga inwayat ti Social Weather Stations (SWS) ken nairuar itay Enero 31, imparangna dagiti kangrunaan a banag a mangimpluensia iti desision dagiti botante a Filipino iti eleksion 2025.
Naiwayat ti Stratbase-SWS January 2025 pre-election survey manipud Enero 17 agingga iti 20 babaen ti rupanrupa nga interbiu kadagiti 1,800 a rehistrado a botante, ket naitampok dagiti ipangpangruna dagiti botante, a pakairamanan ti pannakaadda iti trabaho, pannakataripato iti salun-at, edukasion, ken kalintegan dagiti mangmangged.
Umuna iti listaan ti pannakapataud iti trabaho, panagdur-as ti agrikultura, ken kinatalged ti taraon, nga addaan iti 94 a porsiento dagiti nasurbey.
Kinuna ti 93 a porsiento nga ibotosda dagiti kandidato a mangitandudo iti pannakapatibker iti healthcare system.
Sonza, Sasot, Banat By, pinaayaban ti tri-comm ti Kamara
Adda 92 a porsiento kadagiti nasurbey a mangibotos kadagiti kandidato a mangilungalong iti padapada a kalintegan iti edukasion, kalintegan dagiti mangmangged, ken iti pagimbagan dagiti Overseas Filipino Workers (OFWs).
Dagiti kandidato a mangipangpangruna iti pannakataming ti kinapanglaw ken pannakapabassit dagiti agbisin, panangep-ep iti epekto ti climate change, ken panagsagana iti kalamidad ket suportaran ti 87 a porsiento dagiti botante a nasurbey.
Dagiti kandidato a mangtengngel iti presio dagiti gagatangen ti kayat nga ibotos ti 85 a porsiento dagiti nagsungbat, idinto a 83 a porsiento ti mangibotos kadagiti kandidato a mangipangpangruna iti nailian a seguridad ken ti kalintegan ti Filipinas iti West Philippine Sea.
Maaramid ti panagbobotos iti 2025 midterm election itoy a Mayo. (Merlina Hernando-Malipot/Manila Bulletin//Lito Hilidon/Bannawag)
