Indauluan ni Luka Doncic ti Dallas iti NBA Finals iti napalabas a season. Nakagun-od met ni Anthony Davis iti kampeonato iti Los Angeles Lakers.
Nagsinnukatda itan iti team—babaen ti maibilang a naisangsangayan a trade iti pakasaritaan ti NBA.
Estados Unidos, dinan kayat ti agbalin a kameng ti United Nations Human Rights Council
In-trade ti agdama a Western Conference champion a Dallas Mavericks ni Doncic iti Los Angeles Lakers para ken ni Davis iti daytoy Domingo, Pebrero 2 (oras iti Filipinas).
Kakadua ni Doncic da Maxi Kleber ken Markieff Morris a mapan iti Lakers, idinto a mapan met da Davis ken Max Christie agraman ti 2029 first round pick nga iggem ti Lakers, iti Mavericks.
Nairaman met ti Utah Jazz iti tulag. Mapan ni Jalen Hood-Schifino ti Lakers ken dua a draft pick iti Jazz.
Nagwaras ti damag mapan a maysa nga oras kalpasan nga inatiw ti Lakers ti New York Knicks iti Madison Square Garden. Saan ketdi a karaman ni Davis iti nasao nga ay-ayam ta agpapaimbag iti injury-na iti tian.
Saan met a nakaay-ayam pay ni Doncic manipud idi aldaw ti Paskua 2024, gapu met iti injury-na iti kanigid a butoy.
Segun iti report, saan a naipakaammo sakbayna kada Doncic ken Davis ti nasao a tulag, agraman ni LeBron James a teammate ni Davis iti Lakers. Maibilang a maysa kadagiti makapakigtot a trade iti pakasaritaan ti NBA ta nairaman ni Doncic a maibilang a rupa ti prangkisa ti Dallas Mavericks idinto a kapigpigsaan met ni Davis.
Segun iti report, indiaya ti kampo ti Mavericks ni Doncic iti Lakers ta patienda a mangabak iti kampeonato iti NBA babaen ti depensa—banag a patienda nga awanan ni Doncic ken maipaay ni Davis—idinto a ti Lakers, masapulda ti player a sumukat a superstar iti nasao a prangkisa gapu iti mapaspasangasangan a panagrerito ni James, ken saan met a maipaay ni Davis. (Manipud iti Associated Press ken AST)
