Naipaulog ti show cause order ita nga aldaw, Peb. 4, maibusor ken ni dati a press secretary Trixie Cruz-Angeles ken dadduma pay a personalidad iti social media gapu iti dida idardar-ay iti panangbista ti Tri-committee (Tri-comm) ti Kamara iti panagraira ti fake news ken palso nga impormasion online.
Tallo laeng ti dimmar-ay kadagiti 40 a naawis a personalidad iti social media iti bista nga inwayat ti Tri-comm a buklen ti tallo a komite ti Kamara: Committee on Public Order and Safety, Committee on Information and Communications Technology, ken ti Committee on Public Information, tapno mabukelda ti linteg a mangparmek iti pannakaiwaras dagiti palso nga impormasion iti social media.
Inmosion dagiti mammanday-linteg a maipaulog ti show cause order a maibusor kadagiti saan a dimmar-ay a saan a balido ti rasonda, ket mapilitda nga umay inton sumaruno a bista.
Ngem iti biang ni Cruz-Angeles, dina inkankano ti awis ti komite, ket kinunana nga "unconstitutional" ti panangbista ti Tri-comm.
Camille Villar, Itantandudona ti “Care Blocks” a Pangparnuay Kadagiti Nasalsalun-at, Ad-adda Pay nga Agkikinnayammet a Komunidad
Binabalaw ni Diputado Joseph Stephen Paduano (Abang Lingkod Party-list) ti sungbat ni Cruz-Angeles, ket kinuna a panangsalungasing daytoy iti autoridad ti Kongreso.
Inmosion ni Paduano a maipaulog ti show cause order kontra ken ni Cruz-Angeles ket mayawat iti Legal Department ti Kamara ti kasona para iti posible a pannakaipila ti disbarment complaint.
Inanamongan dagiti amin a diputado ti naidatag a mosion, ket maikkan iti show casue order da Elizabeth Joie Cruz (Joie De Vivre), Krizette Laureta Chu, Mark Anthony Lopez, Jun Abines Jr., Dr. Richard Tesoro Mata, Aaron Peña, Suzanne Batalla (IamShanwein), ken Ethel Pineda. (Filane Mikee Cervantes/PNA//Lito Hilidon/Bannawag)
