Pormal nga inawat ti Senado ita a malem ti Mierkoles, Pebrero 5, dagiti beripikado a kopia ti Articles of Impeachment kontra ken ni Vice President Sara Duterte, sumagmamano laeng nga oras kalpasan a nasurok a kakatlo kadagiti diputado ti Kamara ti nagbotos tapno ma-impeach (maikkat iti puestona) ti bise presidente.
Simmangpet ni House Secretary General Reginald S. Velasco iti Senado iti agarup 4:30 ti malem tapno maipatulod dagiti dokumento ti impeachment.
Agtakder ti Senado a kas impeachment court bayat ti pannakabista ti bise presidente, a pagpaayan dagiti senador a kas ukom iti nasao a bista.
Uppat nga impeachment complaints ti naipila kontra ken ni Duterte a pakairamanan ti mapapati a di umisu a panangusarna iti confidential funds, graft and corruption ken betrayal of public trust.
Adbokasia ni Camille Villar para iti pamilia ken aglawlaw: Maysa a nagkaysa a pagimbagan ken kinatalged iti masakbayan
Amin dagitoy ket mabalin a pakaibatayan ti impeachment iti babaen ti Konstitusion ti 1987.
Immunan a nagkedked ni Senate President Francis “Chiz” Escudero nga agkomento maipapan iti impeachment complaint tapno maliklikan a maakusaran ti Senado iti partisanship.
Nupay kasta, kinuna ni Senador Joel Villanueva a nakasagana dagiti kameng ti Senado nga agtrabaho ken mangaklon iti responsibilidadda kas impeachment court iti laksid dagiti panagsagana para iti masungad nga eleksion inton Mayo 2025. (Hannah L. Torregoza/Manila Bulletin)
