Ti mismo nga anak ti presidente, ni Ilocos Norte 1st District Rep. Sandro Marcos, ti nangidaulo iti nasurok a 200 a kongresista a nagpirma iti pannakaipila ti maikapat nga impeachment complaint kontra ken ni Vice President Sara Duterte, ita a malem ti Mierkoles, Pebrero 5.
Segun daytoy iti impalgak ti maysa a source kalpasan a pinasingkedan ni House Secretary General Reginald Velasco kadagiti agiwarwarnak a nakagun-od iti nasursurok pay ngem iti kasapulan a pirma ti maikapat a reklamo tapno direkta a maipatuloden daytoy iti Senado.
No agballigi ket maibanag ti impeachment, ninto Duterte ti kaunaan a bise presidente iti pakasaritaan ti pagilian nga in-impeach ti Kamara.
Kasapulan laeng ti kakatlo (102) ti 306-miembro a Kamara tapno maisayangkat ti nasao a direkta a pannakaipatulod ti complaint iti Senado.
Adbokasia ni Camille Villar para iti pamilia ken aglawlaw: Maysa a nagkaysa a pagimbagan ken kinatalged iti masakbayan
Kalpasan a maawatda ti complaint, agtitipon ti 23 a kameng ti Senado iti maysa nga impeachment trial court--maysa a quasi-judicial body--tapno maikeddeng no nakabasol wenno saan ni VP Duterte maibasar kadagiti articles of impeachment a nailanad iti complaint.
Agpapaay ni Rep. Marcos a kas senior deputy majority leader ti Kamara. (Ellson Quismorio/Manila Bulletin)
