Nangidatag iti petision ti 17 a Vlogger iti Korte Suprema (SC) itay Peb. 4 tapno lapdanda ti panangbista ti Kamara kadagiti vlogger gapu iti maipagarup a palso ken malisioso a paskilda iti social media.
Kiniddawda iti SC a mangipaulog iti temporary restraining order (TRO) a dagus a mangpasardeng iti bista ti Kamara.
Dimmatag iti Korte Suprema da Ernesto S. Abines Jr., abogado a Glenn Chong, Mark Anthony Lopez, Mary Jean Q. Reyes, Dr. Richard T. Mata, May Catherine Diaz Binag, Ethel Pineda Garcia, Krizette Laureta Chu, Jonathan A. Morales, Lorraine Marie Badoy Partosa, Rose Beatrix L. Cruz Angeles, Aeron S. Pena, Nelson U. Guzmanos, Elizabeth Joie Cruz, Suzanne Batalla, Kester John Tan, ken George Ahmed G. Paglinawan.
Nainaganan a respondent dagiti kameng ti Kamara a da Ferdinand Martin G. Romualdez (House Speaker), Robert Ace S. Barbers, Dan S. Fernandez, Tobias M. Tiangco, ken Jose S. Aquino II.
Marcoleta, nilektiuran ni Tarriela: Saan a parparbo ti WPS!
Babaen ti lawfirm ti Roque and Partners ken ni abogado Tomas Jose B. Berenguer, kinuna dagiti nagpetision a salungasingen ti panangbista ti Kamara ti kalinteganda iti nawaya a panangipeksa iti kapanunotan kas sagudayen ti Article II, Section 4 ti 1987 Constitution.
Kinuna dagiti nagpetision a dagiti pangta, panagimbestigar, ken dadduma pay nga aramid dagiti nadakamat a diputado ket nairanta a manglemmes iti timek, no di man naan-anay a mangpaulimek, kadagiti vlogger (agraman dagiti nagpetision) a natured a tumakder, mangbabalaw ken mangipaay iti kapanunotan a maiduma iti kayat dagiti respondent. (Rey G. Panaligan/Manila Bulletin//Lito Hilidon/Bannawag)
