Iti maysa a napardas ti panagbaliwbaliwna a digital a tay-ak, rimsua ti pinansial a cybercrime a kas dakkel a pangta, a namagbalin iti rinibu a Filipino a nalaka a maapektaran kadagiti mangal-allilaw a mangus-usar kadagiti mas sopistikado a wagas ti pananggundaway. Manipud iti phishing agingga iti smishing, vishing, ken uray ti kaudian a wagas--quishing--agtultuloy a gunggundawayan dagiti scammer dagiti kaaduanna ket saan a makadlaw a biktima, a pagangayanna, matakaw ti minilion a pisos a nagrigrigatanda nga inurnong. Kas panangbigbigna iti madagdagus a panagkasapulan kadagiti napigpigsa a legal a salaknib, nangbukel ni Senador Mark Villar iti desidido nga addang babaen ti panangidaulona iti Anti-Financial Account Scamming Act--maysa a naisangsangayan a linteg a nairanta a manglaban kadagiti online scammer ken mangpatibker iti pinansial a seguridad ti pagilian.
Ti Panagraira dagiti Digital Scam: Maysa a Nailian a Pakaseknan
Napaliiw iti Filipinas, kas iti adu a nasion, ti nakadadanag a panagraira ken yaadu dagiti kaso ti digital fraud. Agus-usar dagiti scammer iti nadumaduma a pangallilaw a taktika, a masansan a biktimaenda dagiti indibidual babaen dagiti kas man inosente a mensahe, sinusuitik a transaksion iti banko, ken nasigo ti pannakaiwayatna a social engineering. Segun iti nabiit pay a datos, iti umuna a walo a bulan laeng ti 2023, nasurok a 8,000 a Filipino ti nabiktima iti online scams, a nakapukawanda iti nasurok a PhP155 a milion.
Dip. Paolo Duterte, napalubosan nga agbiahe iti 17 a pagilian
Maysa a partikular a nakas-ang a kaso a dinakamat ni Senador Villar ket mainaig iti maysa a cancer patient a nakidkidan ti medikal a pondona iti e-wallet account daytoy. Dagitoy a pasamak, ipaganetgetda ti naranggas nga epekto ti pinansial a cybercrime--saan laeng a kadagiti personal a pinansia no di ket iti biag ken panagbiag.
Ti Anti-Financial Scamming Act: Maysa a Natured nga Addang nga Agturong iti Pinansial a Seguridad
Gapu ta determinado a mangpasardeng kadagitoy a panangallilaw nga aramid, intandudo ni Senador Mark Villar ti Anti-Financial Account Scamming Act--maysa a gakat nga espesipiko a nadesinio a manglapped iti pinansial a cybercrime. Sibaballigi a dinepensaanna ti Anti-Financial Scamming Act idi panawen ti interpelasion daytoy iti Senado, nakaparnuay ni Villar iti nakapapati a rason para iti kasapulan a pannakamoderno ti legal a balabala ti pagilian tapno epektibo a mataming dagiti rumrumsua a digital a pangta.
“Iti panagruar dagiti baro a wagas ti panangallilaw a kas iti phishing, vishing, ken smishing, masapul a makidanggay dagiti lintegtayo kadagiti dinamiko a panagbalbaliw iti digital environment,” impaganetget ni Villar. “Isingsingasingmi ti Anti-Financial Scamming Act tapno masigurado nga addanto lehislasion nga espesipiko a maiturong kadagiti scammer nga agus-usar kadagiti financial account.”
Napigpigsa a Legal a Balabala Kontra iti Pinansial a Cybercrime
Idinto a dagiti agdama a linteg kas iti Anti-Money Laundering Act (AMLA) ti 2001 ket mangipaay iti legal a pundasion para iti pananglaban iti panagkusit, intampok ni Villar dagiti kangrunaan a nagdumaan ti AMLA ken ti Anti-Financial Scamming Act. Saan a kas iti AMLA, a kangrunaan a mangtaming iti money laundering, direkta a puntiriaen ti Anti-Financial Scamming Act ti financial account fraud, a mangipasigurado a nalawag a maawatan ken makedngan iti umisu a pannusa iti babaen ti linteg dagiti paglabsingan a kas iti money muling ken dagiti iskema ti social engineering.
“Dagiti madusa a paglabsingan iti babaen ti Anti-Financial Scamming Act ket maibilang itan a kas predicate crimes iti babaen ti AMLA, a mangipasigurado a napardas ti panagtignay dagiti pannakabagi ti linteg maibusor kadagitoy nga scam,” inlawlawag ni Villar.
“Iti kaaddan ti nadur-as a teknolohia, kabaelan itan nga isayangkat dagiti manangallilaw dagiti dakes nga aramidda, uray no kas man la saan a makadangran ti maysa a link nga in-click ti maysa nga account owner. Babaen ti Anti-Financial Scamming Act, pullatanmi dagitoy a legal a pakayabutan.”
Panangpabileg kadagiti Pinansial nga Institusion Para iti Napardas a Panagtignay
Malaksid iti panangpatibker kadagiti legal a probision, mangipaay met ti Anti-Financial Scamming Act kadagiti pinansial nga institusion kadagiti naing-inget a sistema ti panangmanehar iti risgo tapno maduktalan ken malapdan dagiti mangallilaw a transaksion. Iti babaen ti naisingasing a panglakagan, maikkan ti Bangko Sentral ng Pilipinas (BSP) iti autoridad a mangsukimat ken mangimbestigar kadagiti mapagduaduaan nga account nga awan ti gagangay a lapped nga ipapaay dagiti linteg iti bank secrecy.
“Babaen iti Anti-Financial Scamming Act, maaddaan iti bileg ti BSP nga agtignay a dagus kadagiti mapagduaduaan a transaksion a saanen nga agdalan iti komplikado a proseso ti seguridad dagiti identidad babaen kadagiti tradisional a panglakagan ti banko,” inlawlawag ni Villar. “Kaipapanan daytoy ti naparpardas a panagtignay, pannakakissay ti pannakataktak, ken nasaysayaat a proteksion para kadagiti umili a Filipino.”
Mandaran pay ti Anti Financial Scamming Act dagiti banko, e-wallet providers, ken pinansial nga institusion a mangipatungpal iti multi-factor authentication (MFA), fraud management systems (FMS), ken nainget a proseso ti beripikasion ti identidad tapno masalakniban dagiti financial account dagiti dagiti kliente manipud iti saan nga autorisado a pannaka-access.
Panamagkaykaysa iti Senado para iti Scam-Free a Filipinas
Ti dedikasion ni Senador Villar a manglaban kadagiti online scam ket nakagun-od iti nasaknap a suporta iti ikub ti Senado. Iti maysa a naisangsangayan a panangipakita iti panagkaykaysa, nagkakadua da Senate President Migz Zubiri, Majority Leader Joel Villanueva, ken da Senador Win Gatchalian, Bong Revilla, ken Jinggoy Estrada a kas co-sponsor ti gakat ti Anti-Financial Scamming Act, a nangdanggay iti awag ni Villar para iti madagdagus a lehislatibo a panagtignay.
Kabayatan ti sponsorship speech-na, inyebkas ni Villar ti napudno a pannakaseknanna iti nakadadanag a panagngato dagiti kaso ti financial cybercrime, ket inkarina a siguraduenna a saanen a mabiktima pay dagiti Filipino kadagitoy a panggep a panangallilaw.
“Taktakawen dagiti scammer ti pagrigrigatan a teggeden dagiti kailiantayo a para iti inaldaw-aldaw a gastosda. Nadadagsen a krimen dagitoy a maar-aramid kadagiti kailiantayo, ket adda kadatayo ti panangsigurado a mapasardeng dagitoy iti kabiitan a panawen,” indeklararna.
Maysa a Masakbayan a Nawaya kadagiti Scam: Ania ti Sumaruno para iti Anti-Financial Scamming Act?
Kalpasan dagiti naballigi nga interpelasion, madama itan a maam-amendaran ti Anti-Financial Scamming Act iti Senado sakbay a maisaang daytoy iti dadduma pay a lehislatibo nga aksion. Apaman a maipaulog a linteg, agserbi daytoy a kas kangrunaan a legal a salaknib kontra iti pinansial a cybercrime, a mangted kadagiti autoridad ken pinansial nga institusion kadagiti kasapulan a gamigam tapno epektibo a malabanan ti panangallilaw ken panagkusit.
Para ken ni Senador Mark Villar, saan laeng a kas maysa a gakat ti ibagbagian ti Anti-Financial Scamming Act--napateg nga addang daytoy para iti pannakapatalged iti digital a masakbayan ti Filipinas.
“Diak mabalin ti agkamkampante lattan ken awan ti aramidek bayat a taktakawen dagiti scammer ti kuarta a pagrigrigatan a teggeden dagiti kailiantayo,” ingganetget ni Villar. “Babaen ti Anti Financial Scamming Act, maaddaantayo kadagiti natibtibker a pangsaluad kontra kadagiti manangallilaw a transaksion ken mapabileg dagiti pinansial nga institusiontayo a mangaramid kadagiti proactive measures kontra kadagitoy a cybercriminal.”
Iti kaaddanton ti Anti-Financial Scamming Act, saanen nga arapaap laeng ti maysa nga scam-free a Filipinas--maysa daytoy a panggep nga asidegen a madanon. Gapu iti di agpalta a panagkumit ni Senador Mark Villar ken dagiti kakaduana a mammanday-linteg, pumigpigsa ti pannakidangadang kontra iti financial cybercrime, a mangikarkari iti nataltalged a digital a tay-ak para iti amin a Filipino.--O
