Nailayon ti termino ni P/Gen. Rommel Francisco Marbil a kas hepe ti Philippine National Police (PNP) iti uppat a bulan, kas impakaammo ti Malakanyang ita nga aldaw, Peb. 6.
Iti memorandum nga impaulog ni Presidente Marcos Jr. ken pinirmaan ni Executive Secretary Lucas Bersamin idi Peb. 4, mangrugi a mailayon ti termino ni Marbil inton Peb. 7, iti aldaw ti panagretirona.
Itay napan a bulan, kinuna ni Presidente Marcos a pampanunotenna ti pannakailayon ti termino ni PNP Chief Marbil, ta masapul a natibker ti liderato ti PNP iti panawen ti eleksion.
Ni Marbil, a maika-30 a hepe ti PNP, ket kameng ti Sambisig Class of 1991 ti Philippine Military Academy ken nagakem a kas daulo ti PNP idi Abril 1, 2024. (Argyll Cyrus Geducos/Manila Bulletin//Lito Hilidon/Bannawag)
