Iti maysa a narimat nga agsapa ti Sabado, situtugaw ni Camille Villar iti dumna ti dakkel a tawa ti opisinana iti Las Piñas, silsilnagan ti lawag ti init dagiti nadalimanek ti pannakaibuntuonna a libro ken dokumento iti lamisaanna. Iti ruar, napno ti siudad iti gagangay nga ariwawa ti ngudo ti lawas-- dagiti pamilia nga agpagnapagna, dagiti nakabisikleta nga ubbing nga aglulumba iti kalsada ti sangakaarrubaan. Ngem iti uneg dagiti diding, nauneg ti pampanunoten ni Camille, a mangdardarepdep iti arapaap ti Filipinas a napnuan inanama ken praktikal.
Iti panunotna, inlawlawagna, nakitana ti maysa a pagilian a taeng dagiti ubbing nga agriing iti tunggal aldaw a makarikna iti kinatalged, pannaranay, ken gagar no ania ti adda iti masanguanan. "Salun-at ti panunot, panangpasayaat iti paglaingan, ken panagnegosio ket rumbeng nga agkukuyogda amin," kinunana, a mangtaptapik iti papel a nangisuratanna iti bitlana. Patienna a no ti kagimongan ket agpuonan kadagiti tattaona – bagi, panunot, ken kinalaing - dayta ti mangitunda iti mataginayon a panagdur-as.
Mangrugi dayta a gandat iti siled a pagadalan. Binukel ni Camille iti panunotna ti ladawan: dagiti mannursuro, saan laeng a matematika wenno lengguahe ti isursuroda, no di ket aktibo met a mangparayray iti emosional a kinatalged. Mangibinglay maipapan iti panangammo iti bagi ken panangtaming iti pannakariribuk a nailimog iti inaldaw a panangisuro, tapno masursuro dagiti estudiante a sanguen dagiti karit ti biag a buyogen ti kinaandur. "Mamatiak met a nasken a mairaman ti entreprenuership iti nasapa a paset ti biag," innayonna, a nanglagip iti dimmakkelanna a pamilia iti tay-ak ti negosio ken serbisio publiko. Iti sirmatana, makipaset dagiti ubbing kadagiti proyekto a mangisuro kadakuada nga agbadiet, agparnuay, ken aglako - dagiti pamunganayan ti panagpanunot ti negosiante.
Iti ruar ti pagadalan, makita ni Camille dagiti pamilia a kas kangrunaan a paset daytoy a panagbalbaliw. Masirmataanna dagiti maisayangkat a panagsanay ken panagadal a nairanta a tumulong kadagiti nagannak a mangammo kadagiti pamunganayan a banag maipapan iti salun-at ti panunot, pinansial a kinalaing, ken dagiti panangaywan iti bassit a negosio. "Panunotenyo ti ina ken ti anakna a babai nga agsursuro a sangsangkamaysa," kinunana, ket nagrimat dagiti matana iti dayta a kapanunotan. "Maysa nga aldaw, mabalin nga agdanggaydanto a mangirugi iti bassit a pagbiagan - mabalin a maysa a panganan nga agbalinto a dakkel a restauran, wenno ti online a pagtagilakoan nga agbalinto a nalatak a nagan." Babaen dagitoy a padas iti panagsursuro iti tunggal henerasion, dagiti pagtaengan ket agbalinto a lugar ti panagsirarak ken panagtinnulong, a mangpatibker iti pammati a ti emosional a kinatalged ti mangparayray iti propesional a tarigagay.
Polis a wanted iti panagrames, natiliw kalpasan ti ilalasatna iti EDSA busway
Manipud sadiay, tinaliaw ni Camille ti panangaywan iti salun-at, ket inladawanna ti kapanunotanna maipapan iti napagkaykaysa a sistema a mangipaay iti serbisio ti panangbalakad ken panangaywan iti salun-at ti panunot, a buyogen ti panagsanay kadagiti sentro ti komunidad. Inlawlawagna a dagiti tao iti adayo a lugar ket mabalin a maaddaan iti telemedicine para iti panagpaagas ken masursuroda met no kasano ti mangirugi iti online a negosio wenno mangilako iti lokal a produkto iti sangalubongan. Babaen ti panangisinggalut ti emosional a suporta iti praktikal a panangpatanur iti kabaelan, magun-odan dagiti komunidad dagiti ramit a mangkissay iti pinansial a pakariribukan - maysa a kangrunaan a banag iti salun-at ti panunot.
Patienna a masapul met nga agbaliw dagiti pagtrabahuan tapno masuportaran daytoy a sirmata. "Ania ngata no mangipasdek dagiti kompania iti pagalagadan a mangiraman iti aldaw para iti salun-at ti panunot ken mangbangon kadagiti pagsursuruan dagiti empleado nga addaan iti kapanunotan nga agnegosio?" inamadna. "Dayta ti mangpataud iti kultura ti panangaywan ken panangparnuay." Natibker ti pammati ni Camille a no marikna dagiti tao a maay-aywananda - ket maikkanda iti gundaway a mangpasayaat iti paglainganda - ad-adda a makiramanda ken agbalinda a produktibo.
Kas maysa a nalatak a mangitantandudo iti panangusar iti teknolohia a mangtaming kadagiti giwang ti kagimongan, sipapasnek a dinakamatna ti akem ti digital platform. Nagrimat dagiti matana idi pinampanunotna ti maysa a mannalon iti probinsia a mabalin a mangbuya iti panagisuro maipapan iti organiko a ganagan iti maysa nga app, sa tumabuno iti virtual counselling session no nakaron ti pannakariribukna. "Kastoy ti panamagbalintayo iti teknolohia a kas puersa ti panagkaykaysa ken pannakapabileg," kinunana.
Kas pangserra, nagsubli ni Camille iti sentro ti arapaapna: dagiti ubbing. "Kayatko a dumakkel ti anakko - ken tunggal ubing a Filipino - a dumakkel iti pagilian a mangtaripato iti puso ken panunot," kinunana a siaalumamay. Makitana ti Filipinas a mangtimbeng iti panagrang-ay ken pannakipagrikna, panagnegosio ken ti kinatalged, ken ti teknolohia nga adda pakainaiganna iti tao. Patienna a dayta a pannakatimbeng ti tulbek iti masakbayan a tunggal maysa, manipud iti maysa a mangngalap iti maysa nga ili iti igid ti baybay agingga iti maysa nga agtutubo a programmer iti Manila, ket siwawaya nga agsursuro, mangparnuay, ket rumang-ay.
Bayat a nalpas ti interbiu ni Camille Villar, naligsayen ti init iti agsapa, a nangyetnag iti atiddog nga anniniwan iti papelna. Ngem nagtalinaed iti rupana ti raniag dagiti sirmatana. Iti ruar, agtultuloy ti biag iti Las Piñas - naariwawa, agsapsapul, mangnamnama. Ket iti uneg ti opisinana, nabukel ti maysa a plano para iti mannakipagrikna, nalaing, ken naregta a Filipinas a pinabileg ti pammati a ti kadakkelan a gameng ti maysa a pagilian ket ti kinaragsak ken tikabaelan nga umilina. --O
