Tapno agbalin nga epektibo ti pannakataming ti bullying ken maitandudo ti natalged a pagadalan dagiti estudiante iti entero a pagilian, reprepasuen ti Department of Education (DepEd) itay Peb. 6 ti Implementing Rules and Regulations (IRR) ti Anti-Bullying Act of 2013.
Impaganetget ni Sekretario ti DepEd Sonny Angara ti pateg ti pannakapatibker daytoy a paglintegan tapno naan-anay nga annuroten dagiti pagadalan iti entero a pagilian.
Kinuna ti Second Congressional Commission on Education (EDCOM 2) nga tumultulongdan iti DepEd tapno mapadaras ti pannakarebisar ti IRR ti Anti-Bullying Act.
Insingasing ti EDCOM2 iti DepEd a pasaknapenda ti depinision ti bullying, ken pasayaatenda ti programa a mangtaming ken manglapped iti bullying, agraman ti kaadda ti guidance counselor ken discipline officer a mangtaming iti kaso ti bullying kadagiti pagadalan.
Innayon ti EDCOM2 a ti DepEd ti mangbukel iti IRR ti Republic Acts 11036 (Basic Education Mental Health and Well-Being Promotion Act) ken 11206 (Secondary School Career Guidance and Counseling Act), tapno maitunos dagitoy iti Anti-Bullying policy ken iti dua a paglintegan.
TRO kontra iti proseso ti Kamara iti impeachment ni VP Duterte, kiniddaw dagiti abogado
Iti biang ti DepEd, kinuna ni Angara nga ipasdekda ti Learner Rights Protection Division tapno adda agbantay iti pannakaipatungpal iti polisia iti amin a dibision ken pagadalan.
Innayon ni Angara nga ipangoangrunada ti kaadda ti guidance counselor wenno ti kapadana a posision tapno adda tao a tumulong kadagiti biktima ti bullying. (Merlina Hernando-Malipot/Manila Bulletin//Lito Hilidon/Bannawag)
