Idur-as ni Senador Mark Villar ti pannakaipatakder ti mandatorio a siled a pagkararagan para kadagiti Muslim kadagiti para publiko nga opisina ken establisimiento babaen ti panangipilana iti Senate Bill No. 2288, wenno ti Act Mandating the Establishment of Muslim Prayer Rooms in all Public Offices and Establishments.
Idiaya ti nasao a gakat a mangbilin kadagiti amin a para publiko nga opisina ken establisimiento iti sibubukel a pagilian a maidesignar ken maiplastar ti saan a nababbaba ngem maysa a nakasina a siled a pagkararagan para kadagiti Muslim iti las-ud ti masakupan dagiti nasao nga opisina wenno establisimiento. Ti probision ken pannakamantenir dagiti nasao a siled a pagkararagan dagiti Muslim ket responsibilidad pay dagiti maseknan a para publiko nga opisina ken establisimientro.
Manipud iti pannakaipila ti gakat, nangrugin a maidur-as daytoy ta nadengngeg wenno naiparangen iti publiko babaen ti Committee on Cultural Communities and Muslim Affairs.
Kas kangrunaan nga autor ti gakat, impeksa ni Senador Mark Villar ti panagyamanna iti oportunidad a mangidur-as iti gakat iti imatang ti komite ken dagiti naawis a resource person manipud iti Komunidad Dagiti Muslim.
Panagangkat iti 25,000 a tonelada nga ikan, inaprobaran ti DA
Babaen ti maysa nga statement, kuna ni Villar a pakaidayawanna ti mangidur-as iti panagbalbaliw para kadagiti kakabsat a Muslim. Ibilbilin ti pammati a Muslim a masapul nga agkararag iti maminlima iti inaldaw ti maysa a Musli. Ti naipila ngarud a gakat ti manggarantia kadakuada a maaddaanda kadagiti siled a pagkararagan a makapagkararagda iti naulimek ken nadalus a disso.
Innayon pay ni Villar a mamati a nupay nagarantia iti Konstitusion ti nawaya a pannakatungpal dagiti annongen kadagiti relihion nga awanan iti pannakailanglangi, gapu ta Katoliko ti kaaduan a Filipino, adda latta panagkurkurang a masapul a mapunnuan babaen ti panangipaay iti umisu a gundaway para kadagiti sabsabali a relihion tapno maaramid met dagiti annongen dagiti mamati kadagitoy (a relihion) kadagiti para publiko a lugar.
Kuna pay ni Villar a malaksid iti panangipaay kadagiti siled a pagkararagan kadagiti kakabsat a Muslim, maysa daytoy a napateg nga addang iti Muslim-friendly campaign daytoy ti pannakapataud dagiti umdas a siled a pagkararagan kadagiti para publiko nga opisina ken establisimiento a mausar dagiti turista a bumisbisita iti pagilian, ngarud, ad-adda pay a makatulong iti turismo.
Kuna pay ni Villar a maikari dagiti kakabsat a Muslim iti umdas nga espasio tapno maibunannagda ti pammatida ket pakaidayawanna ti mangipaay iti pangrugian dagiti Muslim a maiwayatda dagiti annongenda iti pammatida.
