Agdagup iti pito nga artikulo, nga addaan 6 nga alegasion, ti mangbukel iti impeachment complaint kontra ken ni Vice President Sara Duterte a pinirmaan ti aganay a 240 a kameng ti Kamara (215 ti immuna a nagpirma, sa kimmamakam ti 25 pay) ken naipatuloden iti Senado.
Adtoy ti naun-uneg a panangamiris kadagiti innem nga alegasion a no pagtitiponen, mabalin a makagun-od iti pannakakonbiktar ti bise presidente ket maikkat iti puesto.
Artikulo 1: Conspiracy wenno panagkokomplot a mangpapatay kada Presidente Ferndinand Marcos Jr., First Lady Liza Araneta-Marcos, ken Speaker Martin Romualdez.
Mabalin a maysa kadagiti kadagsenan nga alegasion ti mapapati a panggep ni Duterte a mangpapatay kadagiti agassawa a Marcos ken ti naminsan a Lakas-Christian Muslim Democrats (Lakas-CMD) party-mate-na (Sara Duterte) a ni Romualdez.
Nora Aunor, 71, pimmusay
Nangidatag dagiti imbestigador ti Kamara iti ebidensia a bukod a panangadmitar iti publiko ni Duterte a segun kenkuana, nangtangdan iti maysa a mammapatay a mangpapatay kadagiti kangatuan a lider ti gobierno. Iti kallabes, imbunannagna pay a pampanunotenna a kayatna nga ipungsay ti ulo ti presidente. Dagitoy a waragawag a naggapu a mismo kenkuana, nangrubrob kadagiti pakaseknan iti nasional a seguridad.
Kinuna dagiti diputado a ti panangipalubos ken ni Duterte nga agtalinaed iti opisinana ket manggubuay iti direkta a pangta iti nasional a kinatalged, a mamagbalin a kasapulan ti impeachment.
Artikulo 2: Malversation ti PhP612.5 milion a kompidensial a pondo
Maak-akusaran ni Duterte iti di umisu a panangusar ken ilegal a panangiruar iti PhP612.5 a milion a kompidensial a pondo bayat ti panagtakemna kas bise presidente ken kas secretary ti Department of Education (DepEd). Natakuatan dagiti imbestigador dagiti sumaganad:
* PhP254.8-milion a mapagduaduaan a disbursements iti babaen ti Office of the Vice President (OVP), a nainaig iti 1,322 a parbo a benepisiario nga awanan iti birth records.
* PhP43.2-milion iti mapapati a ghost transactions a pakairamanan ti 405 a peke a nagan iti babaen ti confidential fund ti DepEd.
* Nagtestigo dagiti special disbursing officer (SDO) a nabilinda a mangted kadagiti kompidensial a pondo kadagiti saan nga autorisado nga indibidual.
Dagitoy a maipagarup a pinansial nga iregularidad, buklenda ti technical malversation, panagkusit, ken panagkunniber.
Artikulo 3: Panagpasuksok (bribery) ken panagkunniber iti DepEd
Naakusaran pay ti bise presidente iti panagsuksok ken financial manipulation iti uneg ti DepEd. Segun kadagiti naiparang nga ebidensia, inaprobaranna dagiti sagut ken pasuksok a kuarta a maited kadagiti nangato ti saadna nga opisial a mangas-asikaso kadagiti proseso ti panaggatang (procurement) ken bidding.
Nairaman kadagiti naakusaran dagiti sumaganad:
* Dati nga Undersecretary ti DepEd Gloria Jumamil-Mercado (Procurement Head)
* Bids and Awards Committee Member Resty Osias
* DepEd Chief Accountant Rhunna Catalan
* Special Disbursing Officer Edward Fajarda
Segun pay kadagiti imbestigasion, ginandat ti abogado a ni Reynold Munsayac, dati nga spokesperson ni Duterte, a baliwan ti DepEd Computerization Program tapno mapaboran kadagiti napili a contractor, maysa nga aramid a manglabsing iti Republic Act (RA) No. 3019 wenno ti Anti-Graft and Corrupt Practices Act.
Artikulo 4: Di mailawlawag a kinabaknang ken saan a panangipalgak kadagiti sanikua
Iti panangsukimat iti Statement of Assets, Liabilities, and Net Worth (SALN) ni Duterte, naammuan dagiti sumaganad:
* Namimpat nga immadu ti net worth-na manipud 2007 agingga 2017, nga awan ti lehitimo a yaadu ti matgedan.
* Di kumurang a PhP2 a bilion ti mapagduaduaan a transaksion a nainaig iti joint bank accounts a kabinglayna ni dati a presidente Rodrigo Duterte.
* Dagup a di mailawlawag a natgedan a PhP111.6 a milion manipud 2006 agingga 2015.
Ti saan a naan-anay a panangipalgak kadagiti sanikua ken pagtaudan ti matgedan ket maysa a panaglabsing iti Section 17, Article XI ti 1987 Philippne Constitution.
Artikulo 5: Pannakiraman kadagiti extrajudicial killings (EJK) .
Nagtestigo ni dati a police officer SPO4 Arturo Lascanas a nairaman ni Sara Duterte iti Davao Death Squad (DDS) kabayatan ti panagtakemna a kas mayor ti Siudad ti Davao.
Segun ken ni Lascanas:
* Personal nga imbilin ni Duterte dagiti panagpapatay babaen ti Operation Tokhang.
* Nalimed a naikali dagiti bangkay dagiti biktima kadagiti mass grave iti Laud Quarry.
Dagitoy nga alegasion ket nanginaig ken ni Duterte iti nakaro a panaglabsing kadagiti karbengan ti tao.
Artikulo 6: Destabilisasion, insureksion, ken panangriribuk iti publiko
Naakusaran ti bise presidente a makiramraman kadagiti aramid a nairanta a mang-destabilize iti gobierno ti Filipinas, a pakairamanan dagiti sumagnad:
* Panangboykot iti State of the Nation Address (SONA) kabayatan ti panangideklararna iti bagbagina a kas “designated survivor” (sumublat a presidente no matay wenno saanen a kabaelan nga agturay ti nakatugaw a presidente).
* Nangidaulo kadagiti rali a mangkidkiddaw iti panaglusulos ni Presidente Marcos.
* Panangdepdependar iti publiko ken ni fugitive pastor Apollo Quiboloy, a maysa nga am-ammo a kaaliadona, a naidarum iti nadadagsen a krimen.
* Pananglapped kadagiti panagisbestigar ti Kongreso babaen ti panangbilinna kadagiti taona a saan a mangtungpal kadagiti subpoena.
* Panagipangta iti pisikal a pannakadangran ti Presidente, First Lady, ken House Speaker.
Segun kadagiti diputado, maidasig dagitoy nga aramid kas seditious (agpanggep a mangtippuog iti turay) ken maysa a wagas ti insureksion.
Ti Artikulo 7 ket nadakamat laeng a "Pakabuklan ti panagakem ti respondent a kas Bise Presidente." (Ellson Quismorio/MB)
