Insingasing ni kandidato a senador Camille Villar ti pannakaisuro koma ti programming ken computer science kadagiti adda iti elementaria, a kas maar-aramid iti United Kingdom nga inkapilitan ti pannakaisuro ti computing education manipud iti edad 5 sipud pay idi 2014.

Rumbeng daytoy, kinuna ni Villar, tapno maaddaan dagiti ubbing a Filipino iti nasken a digital skills tapno kabaelanda a sanguen dagiti karit nga idateng ti moderno a panawen.

Maisentro ti singasing a kurikulum kadagiti pamuonan nga adal iti computer science agraman ti pannakaammo no kasano nga agtrabaho dagiti kompiuter, dagiti konsepto iti basic programming, ken ti kinapateg ti lohikal a panagpanunot.

Paset pay ti kurikulum ti pannakaparegget dagiti ubbing nga agdesinio kadagiti computer program a mangsolbar kadagiti parikut a paspasaren dagiti tattao, pannakaparungbo ti inobasion ken panagamiris.

Nasional

Panagangkat iti 25,000 a tonelada nga ikan, inaprobaran ti DA

“Nasken a maibilang ti digital literacy a paset ti biag ta daytoy ti lengguahe ti masakbayan. Babaen ti pannakaisuro dagiti ubbing uray agtawenda pay laeng iti lima kadagiti pamuonan nga adal iti computer science, manamnamatayo nga agtalinaed ti Filipinas a di paudi iti global digital economy,” kinuna ni Villar.

Iti UK, nagbalinen ti computing a kas maysa a kangrunaan nga asignatura iti nailian a kurikulum sipud pay idi 2014 a pakaisuruan dagiti ubbing iti coding, algorithms, ken  problem-solving skills. Maibatay daytoy a pagtuladan ti sirsirmataen ni Villar a pangrisut kadagiti karit ken oportunidad a sanguen ti pagilian iti masakbayan.

Kangrunaan a laonen ti singasing a kurikulum dagiti sumaganad: 1. Panangammo No Ania Dagiti Kompiuter: No kasano nga agtrabaho dagitoy ken no apay a napategda iti lubong. 2. Pamuonan nga Ammo iti Programming: Mayam-ammo kadagiti ubbing dagiti coding languages a kas iti Python ken Scratch. 3. Adda Praktikal a Pakaaramatanna: Maengganio dagiti estudiante nga agdesinio ken mangaramat kadagiti computer program a pangrisut kadagiti inaldaw a karit iti panagbiag, manipud kadagiti parikut iti aglawlaw ken nakaparsuaan agingga kadagiti parikut a sangsanguen dagiti komunidad.

Ni Camille Villar (tengnga, nakatakder, ken nakabado iti puraw), kaduana ti sumagmamano nga ubbing iti maysa a lugar a nangidanonanna iti tulong.

Mayayon daytoy a pangpanggepen ni Villar iti panggep met ti Departamento ti Edukasion (DepEd) a mamagbalin a moderno iti sistema ti edukasion ti Filipinas ken iti pannakaipaay kadagiti estudiante dagiti kasapulan a laing a nasken iti digital age. Impaganetget ni Villar a daytoy a programa ket saan laeng a maipanggep iti teknolohia—maipanggep daytoy iti oportunidad. “Saan laeng a para kadagiti software engineer ti programming —ramit daytoy a pagsolbar kadagiti problema, para iti pannakapadur-as ti kinamanagparnuay, ken makaipaay iti ammo a mangpabileg iti tao. Ngarud, no isurotayo daytoy iti tunggal ubing a Filipino, maaddaanda iti gundaway nga agballigi iti masakbayan,” kinunana.

Adu metten ti nangipeksa iti suporta iti daytoy a gannuat a pakaibilangan dagiti edukador, lider iti teknolohia, ken nagannak a nakabigbig iti kinapateg ti nasapa a pannakayadal ti programming kadagiti ubbing. Mairaman kadagiti sumaruno nga addang ti konsultasion kadagiti stakeholders, a pakairamanan ti DepEd, tapno maparnuay ti nasao a kurikulum ken tapno mapaadda dagiti kasapulan para iti sapasap a pannakayimplementarna.

Patien ni Villar a baliwan daytoy a gannuat ti ladawan ti Filipinas, ta parnuayenna ti henerasion a makuna a digitally skilled ken makabael a mangsirarat iti masakbayan; ngarud, dakkel ti maitulongda iti ad-adda pay nga irarang-ay ti pagilian.