Nagakem manipud iti umuna nga aldaw ti tawen 2025 ni Harmony Francisca Cabie-Quinto a kas Senior Director for Education and Training ti Coalition of Filipino American Chambers of Commerce (COFACC) iti Amerika.
Dati a Deputy Regional Director para iti Mountain ken West Coast Region ni Cabie-Quinto, ken agdama a Presidente ti Colorado State Philippine American Chamber of Commerce ken ti Philippine American Chamber of Commerce iti Southern Colorado.
Agnaed iti agdama ni Cabie-Quinto iti Colorado Springs. Katinnulong ni Cabie-Quinto, PRO ti GUMIL Metro Manila (1990-1998), ni Dr. Fatima Bustos-Choy, Vice President for Organizational Development, a mangpataray iti COFACC Leadership Development Academy inton Abril iti daytoy a tawen.
“With her background as an educator, nonprofit board member, and community leader, she has excelled in mentorship, training, and building strategic partnerships,” kinuna dagiti adda iti koalision. Nangisursuro ni Cabie-Quinto a kas professorial lecturer iti Letran College iti Manila ken Jose Rizal University iti Mandaluyong City sakbay a nagpa-California a nagtrabahuanna a kas Paralegal iti maysa nga Immigration Law Office.
Cabie-Quinto, pinadayawan ti COFACC
Kinuna ni Gerry Palon, Presidente ken Chief Executive Officer ti COFACC, a kasapulanda ti agakem a Senior Director nga addaan kabaelan iti “leadership and strategic thinking, program development expertise, faculty development, interpersonal skills, communication excellence, and cultural awareness.”
Idi adda pay laeng iti Filipinas, napili ni Cabie-Quinto a presidente ti ASEAN Law Students Association, nakabase iti Jakarta, ken nagbalin a paratignay ti Association of Law Students of the Philippines. Nagpaay pay, bayat ti panagbasbasana, a kas legislative assistant ni Sen. Raul Roco ken kameng ti Membership Committee ti GUMIL Filipinas idi dekada 90.
Ni Cabie-Quinto ti inauna iti tallo a bunga da Honor Blanco Cabie, agsursurat iti Bannawag ken agdama nga Opinion Editor ti Manila Standard, ken Maria Rosa Cabie, bise presidente ti GUMIL Metro Manila. (Bannawag, Pebrero 16-28, 2025 a bilang)
