Ilunglungalong ni Senador Mark Villar ti pannakaipasdek dagiti parke wenno paginanaan ken estruktura a para kadagiti pedestrian iti tunggal probinsia iti sibubukel a pagilian. Ipagpaganetgetna met dagiti napateg nga akem dagitoy iti panagtagiben, salun-at ti publiko ken kinatibker ti ekonomia. Dinakamat ni Villar kas modelo dagiti naballigi a Boracay Circumferential Road ken ti Tondaligan Beach Walkway iti Pangasinan. Patienna a rumbeng a maaramid dagitoy a panagdur-as iti entero a pagilian tapno maitandudo ti napateg nga akem daytoy iti kinatalged, salun-at ti publiko, ken kinaandur ti ekonomia.
“Iti agtultuloy a panagbangon ken panangpamodernotayo kadagiti impraestrukturatayo, masapul nga ipangrunatayo ti pannakabangon dagiti pasdek ken parke a mabalin a pagpasiaran ken paginanaan dagiti magmagna (pedestrian),” kinuna ni Villar. “Impakita dagiti proyekto a kas iti Boracay Circumferential Road ken Tondaligan Beach Walkway no kasano a ti nasayaat ti pannakadiseniona nga impraestruktura a para iti publiko mapalukayna ti panaggaraw, mapapigsana ti turismo, ken mapasayaatna ti kalidad ti biag. Masapul ngarud nga aramidentayo daytoy kadagiti amin a probinsia.”
Impaganetget ni Villar a ti panangiraman kadagiti parke, kabakiran iti siudad, ken nasayaat ti pannakaplanona a dalan dagiti magmagna (pedestrian) kadagiti proyekto ti impraestruktura ti pagilian ket makatulong a manglaban iti kinaadu ti tao iti siudad, mangkissay iti carbon emission, ken manggutigot iti nasasallun-at a klase ti panagbiag. Napaneknekanen a dagiti green spaces (dagiti parke wenno disso a paginanaan nga addaan kadagiti kaykayo), makatulong a mangleplep iti kinapudot ti siudad, mangpasayaat iti kalidad ti angin, ken mangitandudo iti pagimbagan ti isip, idinto a dagiti pasdek a para kadagiti pedestrian makatulong iti pannakapasayaat ti pannakilangen ken iti panagdur-as ti ekonomia.
Maitunos daytoy nga adbokasia ti senador iti uso ita iti sangalubongan a panangipaset iti sustainability iti panagplano iti panagpadur-as dagiti siudad a saan a maipusta ti panagdur-as ti ekonomia. Gutigoten daytoy a singasingna dagiti gobierno lokal, pribado ken organisasion a maseknan iti aglawlaw, a makitinnulongda iti pannakadisenio ken pannakaipatungpal dagiti eco-friendly nga urban project a mangipangpangruna iti walkability, accessibility, ken environmental conservation.
“Maikari ti tunggal Filipino iti komunidad a natalgedda a magna, makalang-abda iti presko nga angin, ken tagiragsakenda ti nakaparsuaan,” innayon ni Villar. “Babaen ti panangnayon kadagiti impraestruktura a para kadagiti pedestrian ken kadagiti disso a paginanaan ken pagpallailangan iti entero a pagilian, agpuonantayo iti nasalsalun-at, nasaysayaat a pagnaedan, ken nataltalged a masakbayan para iti amin.”
Ti panangilungalong ni Villar kadagiti sustainable infrastructure ket nagramut iti track record-na a mangitantandudo iti naberde ken inklusibo a panagdur-as. Kas dati a Sekretario ti Department of Public Works and Highways (DPWH), isu ti nangidaulo kadagiti proyekto ti gobierno a nangted pateg iti aglawlaw iti pannakabangon dagiti impraestruktura, banag a nangipasigurado iti pannakatimbeng ti nagbaetan ti modernisasion ken pannakatagiben ti aglawlaw.
Impeksa pay ti senador ti suportana kadagiti gakat a mangitandudo iti urban greening, reforestation, ken pedestrian-friendly city planning, kas pangipaganetgetna a kasapulan dagiti linteg a mangipangpangruna kadagiti tattao ken ti planeta iti panagdur-as ti ekonomia.
Iti umad-adu a pakaseknan iti panagbalbaliw ti klima, umir-irut a trapiko, ken kumarkaro a kasasaad ti aglawlaw iti siudad, makuna a ti panawagan ni Villar a pannakapaadda dagiti berde nga espasio ken dagiti impraestruktura a para kadagiti pedestrian iti sangapagilian ket maysa a napateg nga addang nga agturong iti nataltalged ken inklusibo a masakbayan para iti Filipinas.