Masapul a risuten ti Senate Impeachment Court ti kiddaw ti Kamara nga agnanayon a pannakadiskualipikar ni Bise Presidente (BP) Sara Duterte nga agakem iti ania man a pagsaadan iti gobierno.
Daytoy ti ipaganetget da Diputado Joel Chua (Manila 3rd district) ken Jude Acidre (Tingog Party-list ) itay Peb. 10 no bilang aglusulos ni BP Duterte iti saadna sakbay a mangrugi ti impeachment trial ken posible a pannakakombiktarna.
Kinuna ni Chua, a kameng ti prosecution team ti Kamara, a dua a pannusa ti kidkiddawen ti impeachment complaint - ti pannakaikkat ni Duterte a kas Bise Presidente ken ti agnanayon a pannakaiparit kenkuana nga agakem iti ania man a pagsaadan iti gobierno.
Segun ken ni Chua, ti panaglusulos ni Duterte, risutenna laeng ti kiddawda a maikkat ni Duterte a kas Bise Presidente, ngem saan daytoy a risuten ti maikadua a kiddawda.
Senador Mark Villar, ilunglungalongna ti pannakabangon dagiti parke ken pasdek a para kadagiti pedestrian iti tunggal probinsia
Iti laksid ti agdama a kasasaadna, maibilang latta ni BP Duterte a maysa a kapigsaan a kandidato iti 2028 Election, gapu iti kinalatak ti amana a ni dati a presidente Rodrigo Duterte.
Inlawlawag ni Chua a ti Senate impeachment court ket saan a criminal court, ta panggep laeng daytoy a dusaen ti maysa nga opisial maibatay iti articles of impeachment a maidatag, ket gapu ta adda immunity ti Bise Presidente, masapul a maikkat pay nga umuna iti saadna sakbay a maidarum iti kaso a kriminal.
Iti biang ni Acidre, kinunana a mandaran ti Konstitusion ti Senado nga iwayatda ti impeachment trial uray aglusulos ti Bise Presidente. (Ellson Quismorio/Manila Bulletin//Lito Hilidon/Bannawag)
