Naipaay ken ni Harmony Cabie-Quinto, presidente ti Philippine American Chamber of Commerce ti Southern Colorado (PACCSoCo) idi Enero 25, ti kangatuan nga Individual Leadership Award nga inted ti Coalition of Filipino American Chambers of Commerce (COFACC) iti America.
Nayawat ti pammadayaw iti Marriott Hotel, Long Beach, California bayat ti tallo nga aldaw a 2025 Annual Strategic Planning Conference & Small Business Expo nga addaan iti tema nga “Empower, Elevate, Evolve: Building Resilient Chambers for Tomorrow” a nangrugi idi maika-24 ti Enero. Panggep ti Planning Conference a papigsaen pay ti COFACC ken dagiti kameng daytoy.
Napili ni Cabie-Quinto, agdama a presidente ti Colorado State Philippine American Chamber of Commerce, kas pammigbig ti COFACC iti sirmata ken aktibidad nga insayangkat ken indur-as ti PACCSoCo iti napalabas a 2024.
Tumultulong ti COFACC a mangserbisio kadagiti negosio dagiti Filipino American business – agdagup iti agdama ti 35 a Chamber of Commerce – iti entero nga Amerika a pakaibilangan dagiti estado ti California, Florida, Montana, Nevada, Michigan, ken Colorado.
Cabie-Quinto, dati a PRO ti GUMIL Metro Manila, naital-o a Senior Director ti COFACC (USA)
Naipasdek ti COFACC idi 2018 iti California a kas sentro a pakatamingan dagiti aramid a mangidur-as kadagiti nasayaat a gapuanan ken no kasano ti panagtitinnulong dagiti nadumaduma a chamber tapno sumayaat ti panagbiag dagiti pakaibilanganda a komunidad.
“We also honored the outstanding leadership and contributions of various Chamber Partners, highlighting their role in chamber growth, community development, and cross-chamber collaboration,” kinuna ni Gerry Palon, presidente ken CEO ti COFACC.
Rinambakan pay ti panagtitipon ti panaggraduar dagiti nakaileppas iti COFACC Chamber Basic Management Course, maysa a “training and development curriculum focused on effective basic Chamber Management and Operations” kas pagbatayan dagiti agballigi a Chamber.
Itay laeng maika-1 ti Enero, nagakem ni Cabie-Quinto a Senior Director for Education and Training ti COFACC, innem a bulan kalpasan ti panagtugawna a kas Founding President ken CEO ti Colorado State Philippine Chamber of Commerce iti Denver, Colorado bayat ti panangidaulona iti PACSoCo.
Nagpaay ni Cabie-Quinto a PRO ti GUMIL Metro Manila manipud idi 1990 agingga idi 1998 sakbay a nagtrabaho a kas paralegal iti maysa a law firm iti California sakbay a nagnaed iti Colorado, kaduana ti kaingungotna, maysa a combat veteran idiay Iraq. (Cles B. Rambaud/ Bannawag, Marso 1-15, 2025 a bilang)
