Tapno mapunno dagiti bakante a puesto, mapasayaat ti epektibo a panangimaton, ken maipaay ti naan-anay a suporta kadagiti mannursuro ken estudiante kadagiti para iti publiko a pagadalan iti entero a pagilian, inkeddeng ti Department of Education (DePEd) a mangisaad iti 15,000 a prinsipal kadagitoy a pagadalan ita a tawen (2025), kas paset ti panggepna a mangpapigsa iti panangidaulo iti pagadalan ken mangpasayaat iti kalidad ti edukasion.
Pinatalgedan ti DepEd itay Peb. 11 ti panggepna a mangisaad iti nasurok a 15,000 a kualipikado a mannursuro a kas prinsipal a kagiddan ti pannakaipaulog dagiti pagalagadan ken mapabaro ti agdama a proseso ti panangala kadagiti prinsipal kadagiti para iti publiko a pagadalan.
Dinakamat ti DepEd ti Year 2 report ti Second Congressional Commission on Education (EDCOM II) a nangipalgak a 55 a porsiento dagiti public school iti Filipinas ti agtartaray nga awan prinsipalda.
Nadumaduma ti makaigapu iti kinakurang ti prinsipal, ket nairaman ditoy ti nababa a passing rate ti National Qualifying Examination for School Heads (NQESH), nangato a bilang dagiti pumanaw nga empleado, di umdas a bilang dagiti mabalin nga agakem, narikut a qualification processes, ken ti kaawan ti naurnos a panangisuro, panangsanay, ken pormal a programa iti pannakaisaad.
Polis a wanted iti panagrames, natiliw kalpasan ti ilalasatna iti EDSA busway
Maysa kadagiti ipatungpal ti DepEd ti pannakaisaad ti agdama a bilang dagiti nakaruar iti NQESH - 7,916 idi 2024 - tapno mapunno dagiti bakante a kangrunaan a posision kadagiti kualipikado a personnel.
Mangipaulog ti DepEd iti pagannurotan tapno masigurado a dagiti prinsipal a naipatulod kadagiti opisina ket agsublida iti pagadalan a nakaitudinganda.
Malaksid iti daytoy, panggep ti DepEd nga i-reclassify ti 14,761 a Head Teacher (I-V) a kas School Principal I; ti 954 a Head Teacher VI ken Assistant School Principal II a pagsaadan ket agbalin a kas School Principal I.
Inlawlawag ti DepEd nga iti sidong daytoy a proseso, dagiti "acting school head" ket maipangpangruna a kas “on-stream candidates” tapno naparpardas ti pannakaital-oda a kas prinsipal.
Panggep ti DepEd a maadaptar ti School Organizational Structure and Staffing Standards (SOSSS) inton 2026, a mangisaad iti maysa a prinsipal iti tunggal pagadalan. (Merlina Hernando-Malipot/Manila Bulletin//Lito Hilidon/Bannawag)
