Innem a pulo ket pito a porsiento kadagiti nataengan a Filipino ti mangyebkas iti panagayatda babaen kadagiti aramid wenno panangiparikna ti panagserbi, ket daytoy ti natakuatan a nangnangruna a panangipeksa kadagiti lima a pagsasao ti ayat, segun iti nailian a surbey nga inwayat ti Social Weather Stations (SWS) manipud Dis. 12 agingga 18, 2024.
Nairuar ti resulta ti surbey idi laeng Martes, Pebrero 11.
Mairaman kadagiti nadakamat a panangiparikna iti ayat babaen ti aramid ti panagluto iti kanen, panangipan wenno panangitulod kadagiti bambanag (pannakaibaon), ibabadang kadagiti trabaho (iti balay), wenno panangtarimaan kadagiti bambanag iti uneg ti balay--nga uray saan a kidkiddawen.
Dagiti dadduma pay a panangipeksa iti panagserbi ket dagiti balbalikas ti pammatalged ken kaadda ti maipaay a naan-anay nga oras (quality time), nga addaan iti agpada a 51 a porsiento nga iskor; panangted iti sagsagut, 33 a porsiento; ken pisikal a panangiparikna, 29 a porsiento.
PNP: Honeylet Avanceña, makasuan gapu iti panangdangranna iti babai a polis
Ayat ken panagkadkadua: Kaaduan a matartarigagayan a regalo para iti Valentine's Day
Naitunos kadagiti pagsasao ti ayat, naammuan pay iti nasao a surbey a ti ayat ken panagkadkadua ti immuna iti wish list ti regalo a para iri Valentine's, nga addaan iti iskor a 19 a porsiento. Sangapulo a porsiento laeng ti para iti kuarta a kas regalo.
Ayat ken panagkadkadua ti kaaduan a tartarigagayan a sagut para kadagiti lallaki (20 porsiento) ken babbai (17 porsiento), a sinaruno ti ania man a sagut manipud iti puso (9 porsiento) ken sabsabong (8 porsiento) para kadagiti lallaki, ken kuarta (15 porsiento) ken sabsabong (12 porsiento) para kadagiti babbai.
Bumasbassiten ti addaan love life
Natakuatan met ti surbey ti nababa iti rekord a 46 a porsiento kadagiti Filipino a nangibaga "naragsakda unay" iti love life-da.
Adda met 36 porsiento ti nagkuna a saanda unay a naragsak wenno kalikagumanda ti agbalin a naragragsak pay koma.
Sangapulo ket walo a porsiento ti nangibatad nga awan ti love life-da.
Ti 46 a porsiento a naragsakda unay iti love life-da ket nangipakita ti 12 a puntos a bimmabaan ti bilang dagiti nararagsak, manipud iti 58 a porsiento idi Disiembre 2023, ken ti kababaan a porsiento iti las-ud ti 20 a tawen sipud idi 2004.
No idilig idi 2023, bimmaba ti karagsak iti kaadda iti love life kadagiti lallaki ken babbai, iti amin a kategoria ti civil status, partikular kadagiti lallaki nga addaan kabbalay a partner-da.
Naisayangkat ti non-commissioned a Fourth Quarter 2024 Social Weather Survey babaen ti rupanrupa nga pananginterbiu kadagiti 2,160 a nataengan (edad 18 agpangato) iti entero a pagilian: 1,080 a tattao iti Balance Luzon (Luzon iti ruar ti Metro Manila), ken sag-360 a tattao iti Metro Manila, Visayas, ken Mindanao. (Ellalyn De Vera-Ruiz/MANILA BULLETIN)
