Naipanen iti Pasig City Jail Male Dormitory (PCJMD) ni daulo ti Kingdom of Jesus Christ (KOJC) Apollo Quiboloy manipud iti ospital gapu iti "community-acquired pneumonia," kinuna ti Bureau of Jail Management and Penology (BJMP) idi Feb. 13.
Iti maysa nga interbiu, kinuna ni Supt. Jayrex Bustinera, pannakangiwat ti BJMP, a simmangpet ni Quiboloy iti PCJMD idi rabii ti Peb. 12 kalpasan a mayospital daytoy iti sumagmamano a lawas.
Idi Enero 23, imbilin ti Pasig City Regional Trial Court Branch 159 ti pannakayakar ni Quiboloy manipud The Medical City (TMC) maipan iti Pasig City General Hospital (PCGH), a nakadukatalanda iti sakitna a community-acquired pneumonia (moderate risk) ken hypertension stage 2.
Kinuna ni Bustinera a bayat ti kaadda ni Quiboloy iti ospital, pinalubosan ti korte idi Peb. 7 a mangirekord ni Quiboloy iti video para iti panagkampaniana a kas senador.
₱10.8-milion ti balorna a marihuana, nasamsam iti Caloocan
Kalpasan a maikkan iti medical clearance, nairuar iti ospital ni Quiboloy sa naisubli iti Pasig City Jail Male Dormitory.
Adda pangduadua maipapan iti posible nga special treatment para kadagiti nalatak a balud a kas ken ni Quiboloy, ngem saan nga inkankano daytoy ni Bustinera, ket impasiguradona a matrato ni Quiboloy a kas kadagiti dadduma pay a PDL (person deprived of liberty), maitunos iti linteg ken pagannurotan ti pagbaludan.
Segun ken ni Bustinera, adda impaulog ti chief Director ti BJMP a ni Ruel Rivera a nainget a pammilin nga awan ti maibilang a kas “VIP (very important person)," ket impaganetgetna a rumbeng a matrato amin a balud a kas kadawyan a PDL. (Chito Chavez/Manila Bulletin//Lito Hilidon/Bannawag)
