Dinutokan ni Presidente Ferdinand Marcos Jr. ni Vivencio "Vince" Bringas Dizon, dati a presidente ti Bases Conversion and Development Authority (BCDA), kas baro a sekretario ti Department of Transportation (DOTr).
Impakaammo ni Executive Secretary Lucas Bersamin daytoy itay Pebrero 13, kalpasan a naglusulos ti agdama a sekretario a ni Jaime Bautista gapu iti parikut iti salun-atna.
Addan 26 a tawen nga agpapaay iti gobierno, nagserbi pay ni Dizon a kas Presidential Adviser on Flagship Programs and Projects, ken kas deputy chief implementer ti National Action Plan Against Covid-19.
Maysa nga ekonomista ni Dizon, ket dakkel ti naitulongna iti pannakaipatungpal ti “Build, Build, Build” a programa ti administrasion ni dati a Presidente Rodrigo Duterte.
₱10.8-milion ti balorna a marihuana, nasamsam iti Caloocan
Nagpaay met ni Dizon a kas undersecretary iti Office of the Political Adviser (OPA) iti sidong ti Office of the President (OP) manipud 2011 agingga iti 2013, bayat ti panagtakem ni Benigno Aquino III kas presidente.
Mangrugi ni Dizon nga agakem a kas Sekretario ti DOTr inton Pebrero 21, ket tumulong iti “Build Better More” a programa ti administrasion ni Marcos.
Sumagmamano kadagiti imatonanna a dadakkel a proyekto iti impraestruktura ti Metro Manila Subway, MRT Line 7, ken ti North–South Commuter Railway. (Dexter Barro II/Manila Bulletin//Lito Hilidon/Bannawag)
