Nagsarak iti umuna a gundaway da Enrique Manalo (Sekretario ti DFA) ken Marco Rubio (Secretary of State ti Estados Unidos) iti Munich Security Conference a naangay itay Peb. 14, ket nagsaritaanda ti maipapan iti parikut iti South China Sea (SCS) ken panagtinnulong iti ekonomia ti Filipinas ken Estados Unidos (US).
Impaskil ni Manalo iti X (dati a Twitter) ti damo a panagsarakda ken Rubio.
Kinuna ni Tammy Bruce, pannakangiwat ti US State Department, a nagsaritaan ti dua nga opisial ti tignay ti China iti pagsusupiatan a rehion ken mangparayray iti panagtinnulong ti dua a pagilian iti beddeng ti ekonomia.
Kinuna ni Bruce a saan laeng a pinatalgedan ni Rubio ti panagkumit ti Estados Unidos iti aliansa ti Filipinas ken US, no di ket impamatmatna pay ti regtana a mangbangon iti nasingsinged ken agpaut a relasion.
Camille Villar, kalikagumanna ti pannakaipasdek ti ad-adu pay a daycare center
Nairaman iti pagsasaritaanda ti panagtinnulong ti dua a pagilian iti panangtaming iti mangdadael iti kinatalged a tignay ti China iti SCS; naan-anay a panagtinnulong iti impraekstruktura, critical minerals, information technology, ken enerhia a pakairamanan ti civil nuclear cooperation.
Bayat ti kaadda ni Manalo iti Munich, Germany, kasaritana met ni Kaja Kallas, ti High Representative for Foreign Affairs and Security Policy ti European Union. (Raymund Antonio/Manila Bulletin//Lito Hilidon/Bannawag)
