Impaganetget ni Senador Mark Villar ti kinapateg ti Metro Manila Subway Project (MMSP) iti panagballigi ti EDSA Decongestion Program idinto nga impatalgedna ti nasged a tarigagay ti gobierno a pannakapadur-as ti impraestruktura iti riles tapno maipaayan dagiti Filipino iti naparpardas ken episiente nga alternatibo a transportasion. “Ti pannakaileppas ti Metro Manila Subway ti tulbek iti pannakasolbar ti parikut iti patinayon lattan a kinairut ti trapiko iti EDSA ken kadagiti kangrunaan a kalsada,” kinuna ni Villar, dati a Sekretario ti Department of Public Works and Highways (DPWH) ken maibilang a nakapanunot iti programa a Build, Build, Build.
“No ad-adu ti riles, maikabassit ti oras nga agbiahe, ken ad-adda a napasayaat ti kalidad ti biag dagiti minilion a Filipino,” kinunana.
Manamnama a serbian ti ag-33 a kilometro a Metro Manila Subway, manipud iti Siudad ti Valenzuela nga agturong iti Ninoy Aquino International Airport (NAIA), ti nasurok a 500,000 a pasahero iti inaldaw ken ikabassitna ti oras ti biahe iti nagbaetan ti Quezon City ken NAIA manipud iti nasurok a maysa nga oras iti 35 a minuto laeng. Apaman a maaramat daytoy, nalakanto metten para kadagiti pasahero ti umakar nga agbiahe babaen ti MRT-3, LRT-1, LRT-2, ken ti North-South Commuter Railway (NSCR), a mangbukel iti pundasion ti moderno ken agkokonektar a sistema ti transportasion para iti Metro Manila.
Inikkan pateg ni Senador Villar ti akem ti EDSA Decongestion Program, nga agpanggep a mamagbalin kadagiti tren a kas kangrunaan a wagas ti transportasion a saan ket a panagpannuray laeng kadagiti kalsada. Kaduana dagiti baro nga expressway, dagiti skyway, ken dagiti proyekto iti pannakaikalawa dagiti kalsada, agtalinaed ti pannakaisaknap dagiti riles wenno panagbiahe babaen ti tren a kas kangrunaan a proyekto para iti naan-annayas a sistema ti transportasion.
Rubio, Manalo, nagsarak iti umuna a gundaway
“Mayayon iti tarigagaytayo nga agturong iti narangrang-ay a Filipinas, masapul nga ituloytayo ti agipuonan para iti mass transit wenno kita ti transportasion a para kadagiti umili a kas iti Metro Manila Subway,” kinuna ni Villar. “Saan a mabalin nga agsamsammakedtayo lattan kadagiti kalsada. No ad-adu ti impraestruktura iti riles, naluklukay ti trapiko, ad-adu ti magapuanantayo, ken ad-adu dagiti oportunidad a para iti pagbiagan dagiti Filipino.” Babaen ti state-of-the-art technology, agraman ti earthquake-resilient engineering ken dagiti makina a pagaramid iti usok, agbalinto ti Metro Manila Subway a kas umuna nga underground mass transit system ti pagilian, a mangitunda iti panagbalin ti Filipinas a makipada kadagiti dadakkel a siudad iti lubong.
“Nalawag ti panggeptayo: ti Metro Manila a kas maysa a lugar nga addaan iti nalukay a trapiko, addaan iti naparpardas a sistema ti transportasion, ken makabael a makipatar kadagiti dadakkel a siudad iti lubong. Baliwan ti Metro Manila Subway ti amin, ket itultuloykonto ti agtrabaho tapno maipasigurado ti pannakaileppasna,” kinuna ni Villar.
