Iti laksid ti agtultuloy a kampania iti eleksion ken recess ti Kongreso, inkeddeng ti makunkuna a Tri-Committee (Tri-Comm) ti Kamara a maaramid ti maikadua a bista maipapan iti panagwaras ti palso nga impormasion ken padamag online inton Peb. 18.
Ti Tri-comm ket buklen ti Committee on Public Order and Safety, Committee on Information and Communications Technology, ken ti Committee on Public Information.
Maysa kadagiti tamingen ti Tri-comm dagiti sungbat iti Show Cause Orders (SCO) a naipatulod kadagiti sumagmamano a personalidad ti media ken vlogger a di nagparang iti immuna a bista a naangay idi Peb. 4.
Nagballaag ti Tri-comm a mabalin nga agbanag iti dakdakkel a legal action ti di panangikankano iti SCO, subpoena ken contempt charges.
Kongreso, OES, binilin ti SC a mangidatag iti kopia dagiti dokumento mainaig iti 2025 national budget
Naikkan ti SCO da Atty. Glenn Chong, dati a daulo ti PCOO Trixie Cruz-Angeles, Allan Troy “Sass” Rogando Sasot, Mark Anthony Lopez, Lorraine Marie Tablang Badoy-Partosa, Jeffrey Almendras Çeliz, Mary Catherine Binag, Elizabeth Joie Cruz, Elmer Jugalbot, Ernesto Abines Jr., Ethel Pineda Garcia, George Ahmed Paglinawan, Mary Jean Quiambao Reyes, Richard Tesoro Mata, Suzanne Batalla, Vivian Zapata Rodriguez, Aeron Pena, Alex Destor, Alven L. Montero, Claire Eden Contreras, Claro Ganac, Darwin Salceda, Jeffrey G. Cruz, Jonathan Morales, Julius Melanosi Maui, Kester Ramon John Balibalos Tan, Manuel Mata Jr., ken dadduma pay.
Simmungbat babaen ti email da Cruz-Angeles, Cruz, Lopez, Batalla, ken Pineda.
Dadduma a vlogger a di nangikankano iti awis ti komite ti dimmatag iti Korte Suprema tapno kuestionarenda ti legalidad ti bista ti Kamara.
Impaganetget ni Diputado Dan Fernandez, (Sta. Rosa City), daulo ti Tri-comm, a saanda a tarigagayan nga imameg ti kalintegan ti Filipino nga agsao, ngem kayatda a kitaen no umdas dagiti agdama a paglintegan a mangtaming iti dumakdakkel a parikut, wenno kasapulan ti baro a paglintegan.
Ad-adalen ti Tri-comm dagiti mabalin a mabukel a paglintegan a mangsaranget iti digital misinformation, agraman nainget a pagannurotan kadagiti social media influencers, mapasayaat ti regulasion mainaig iti online content, ken natibtibker a panangipatungpal kadagiti kampania ti di umisu nga impormasion a sinuportaran ti ganggannaet.
Malaksid kadagiti vlogger ken personalidad iti social media, inawis met ti Komite dagiti dadaulo ti ByteDance (TikTok), Google Philippines, ken Meta (Facebook/Instagram), agraman dagiti propesional iti tay-ak ti legal ken media, tapno mangibinglay iti kapanunotanda maipapan iti pannakataming ti disinformation ken pannakabukel ti paglintegan mainaig iti daytoy. (Ellson Quismorio/Manila Bulletin//Lito Hilidon/Bannawag)
