Nakasaganan a pirmaan ni Presidente Ferdinand Marcos Jr. ti singasing a linteg a mangbigbig iti kalintegan dagiti Muslim a mangitabon iti minatayda a kas mayannurot iti pammati ken tradisionda, segun ken ni Senate President Francis “Chiz” Escudero.
Daytoy ti impakaammo ni Escudero kalpasan nga anamongan ti Kamara dagiti nabaliwan a paset ti House Bill No. 8925 (Philippine Islamic Burial Act) nga indatag ti Senado.
Babaen ti House Bill No. 8925, mapalubosan ti pannakaitabon ti pimmusay a Muslim uray awan ti death certificate daytoy, ngem masapul a ti tao a nangaramid iti Islamic burial rites wenno ti kaasitgan a kabagian ti natay ti mangipakaammo iti ipapatay iti local health officer iti las-ud ti 14 nga aldaw kalpasan ti pannakaitabon ti pimmusay.
Maibatay iti daytoy gakat, masapul a mairuar ti bangkay ti pimmusay iti las-ud ti 24 nga oras - kas mayannurot iti Islamic rites - manipud iti ospital, nabayadan man wenno saan dagiti nasken a babayadanda iti pannakataming iti bangkay ti pimmusay. (Hannah L. Torregonza/Manila Bulletin//Lito Hilidon/Bannawag)
