Agdagup iti 1,867 a mapapati nga agus-usar ken aglaklako iti droga ti natiliw iti umuna nga 46 nga aldaw ti 2025 bayat a pinapigsa ti National Capital Region Police Office (NCRPO) ti panangipatungpalda iti kampania ti administrasion ni Marcos a bloodless drug war iti Metro Manila.
Segun ken ni Brig. Gen. Anthony A. Aberin, Director ti NCRPO, agarup PhP124 a milion a balor ti ilegal a droga ti nasamsam iti isu met la a panawen, ket kaaduan kadakuada ti shabu ken marijuana.
Nasamsam ti NCRPO ti agdagup iti 15,264.34 a gramo a shabu nga agbalor iti PhP103.79 a milion; 146,770.10 a gramo a bulong ti marijuana nga agbalor iti PhP17.31 a milion; 5.83 a gramo a cocaine, 271.74 a gramo a kush, ken 73 a tabletas nga ecstacy.
Dagiti natiliw a suspek ket addan iti sidong dagiti ahensia a nangtiliw kadakuada ket naidarumda iti panaglabsing iti Republic Act No. 9165, wenno ti Comprehensive Dangerous Drugs Act of 2002.
Kas iti 'UniTeam,' ilunglungalong manen ni Marcos ti 'unity' dagiti lider tapno masolbar dagiti parikut ti Filipinas
Maipalagip a binaliwan ti administrasion ni Marcos ti kampania kontra iti droga ket pinagbalinna a saan a nadara daytoy, manipud iti agresibo a kampania nga inwayat ti napalabas nga administrasion a nakatayan ti nasurok nga 6,000 a maipagarup nga addaan pakainaigan ti droga. (Aaron Recuenco/Manila Bulletin//Lito Hilidon/Bannawag)
