Naipila ti kaso nga unlawful utterances ken inciting to sedition iti saklang ti Department of Justice (DOJ) idi Lunes, Pebrero 17, kontra ken ni dati a presidente Rodrigo R. Duterte.
Impila ni Brig. Gen. Nicolas D. Torre III, hepe ti Philippine National Police-Criminal Investigation and Detection Group (PNP-CIDG), ti kaso.
Panaglabsing iti Artikulo 154 ti Revised Penal Code (RPC) ti unlawful utterances, idinto ti inciting to sedition ket maysa a krimen iti babaen ti ti Artikulo 142 ti RPC.
Inlawlawag ni Torre a ti naipila a kaso ket ginubuay dagiti waragawag ni Duterte kabayatan ti proclamation rally ti Partido Demokratiko Pilipino-Lakas ng Bayan (PDP-Laban) idi Pebrero 13.
Panagangkat iti 25,000 a tonelada nga ikan, inaprobaran ti DA
Kabayatan ti rali, kinuna ni Duterte nga adu unay dagiti kandidato a senador ket kinunana a “papatayentayo itan dagiti senador tapno adda bakante.”
“Kayatna a papatayen dagidiay 15 a senador, kayatna ida a bombaen,” kinuna ni Torre.
Impaganetget ni Torre a “saan a mabalin dagiti kakasta nga statement, nga iti kabigatanna ket kunaen nga angaw laeng."
Kinunana nga impilana ti kaso iti kapasidadna a kas maysa nga opisial ti polisia ken kas maitunos iti DOJ Circular No. 20 nga impaulog idi 2023 ni Justice Secretary Jesus Crispin C. Remulla.
Kinunana pay a ti pannakaipila ti kaso ket "paset ti mandato ti PNP tapno masigurado a masalaknibantayo dagiti umili manipud iti kriminal nga aktibidad a kas iti daytoy."
Kinuna ni Torre a ti DOJ, iti pannakitinnulong ti PNP, ket mangisayangkat iti case build-up ti kaso sakbay nga ikeddengda no mangiwayat ti maysa a panel of prosecutors iti preliminary investigation tapno maadal no maipila ti kaso iti korte. (Jeffrey Damicog/MANILA BULLETIN)
