Ikalkalikagum ni agngayangay a senador Camille Villar ti pannakaitandudo dagiti green jobs wenno dagiti pagtrabahuan a pakausaran ti nadalus nga enerhia ken mangprotektar iti aglawlaw. Igangganetgetna ti pannakayad-adu dagitoy a trabaho iti entero a pagilian a gapu iti potensialda a mangiturong iti panagdur-as ti ekonomia kabayatan ti pannakapreserbar ti aglawlaw. Patienna a ti panagpuonan kadagiti sustainable industries, saan la a mangpataud kadagiti baro nga oportunidad iti panggedan no di ket mangisaad pay iti Filipinas kas lider iti climate-conscious development.
“Ti panangbangon iti mataginayon ken naandur nga ekonomia, mangrugi iti panangpataud iti green jobs,” kinuna ni Villar. “Babaen ti panangsuportar iti nadalus nga enerhia, mataginayon nga industria, ken eco-friendly a business practices, makapataudtayo iti ad-adu nga oportunidad iti panggedan kabayatan ti panangtamtamingtayo ti panagbaliwbaliw ti klima.”
Igangganetget ni Villar dagiti polisia a makatulong kadagiti negosio iti panagbalbaliw dagiti sustainable operations, mangipaay iti insentibo para kadagiti green industries, ken mangipaay kadagiti mangmangged a Filipino kadagiti kasapulan nga skills para iti green economy. Bigbigenna ti renewable energy, sustainable agriculture, waste management, ken ekoturismo kas kangrunaan a sektor a makapataud iti panggedan kabayatan a makatulong iti pagilian iti pannakakissay kadagiti epekto iti aglawlaw.
Agturongen dagiti industria iti sangalubongan para iti sustainability, gapuna nga ipagpaganetget ni Villar a masapul nga isayangkat ti Filipinas dagiti proaktibo nga addang tapno makabael ti workforce ti pagilian para iti agbalbaliw a job market. Segun iti International Labor Organization (ILO), makapataud ti yaallatiw iti maysa a green economy iti minilion a panggedan iti sangalubongan, a mangididiaya iti dakkel nga oportunidad para kadagiti Filipino.
Nora Aunor, 71, pimmusay
“Bayat ti panagtrabahotayo para iti pannakapasayaat ti ekonomia, masapul a siguraduentayo a ti panagprogresotayo ket agpada nga inklusibo ken mataginayon,” innayon ni Villar. “Mangipaay dagiti green job iti agpaut a panggedan dagiti Filipino kabayatan ti pannakasalaknib dagiti natural a rekursostayo para kadagiti sumaruno a kaputotan.”
Ti panangilungalongnaa iti green jobs ket paset ti nawadwada a sirmatana para iti panagdur-as ti ekonomia, pannakasalaknib ti aglawlaw, ken pagimbagan ti kagimongan, a mangpatibker iti panagkumitna kadagiti pagalagadan a mangtimbeng iti panagrang-ay nga addaan pannakataginayon.--O
