Impalgak ti maysa a surbey a kayat ti kaaduan a Filipino a rebbengna a sumango ni na-impeach a Vice President Sara Duterte iti impeachment trial ti Senado gapu iti mamapati a panangkontratana iti maysa a mammapatay a mangpapatay met kada Presidente Ferdinand Marcos Jr., First Lady Liza Marcos, ken House Speaker Martin Romualdez, no bilang ta adda mangpatay kenkuana.
Insayangkat ti Tangere ti nasao a surbey manipud Pebrero 10 agingga 12, 2025.
Segun met kadagiti kongresista a nang-impeach ken ni Duterte, ipaduyakyak ti resulta ti surbey a kidkiddawen dagiti umili ti hustisia ken transparency.
Kinuna ni Ako Bicol Party-list Rep. Jil Bongalon, a maysa met kadagiti 11 a prosecutor ti Kamara iti impeachment case ni Duterte, "nalawag nga indikasion" ti sentimiento dagiti Filipino ti resulta ti surbey ti Tangere.
Kas iti 'UniTeam,' ilunglungalong manen ni Marcos ti 'unity' dagiti lider tapno masolbar dagiti parikut ti Filipinas
Kinunana a kas mammanday-linteg, "rebbengenmi nga ipangag daytoy nga awag ken siguraduenmi nga umabante ti proseso ti impeachment."
Iti kaadda ti "napalaus a suporta" nga agpada nga aggapu manipud iti publiko ken iti Kamara, kinuna ni Bongalon a "nasken unay a buklenen ti Senado ti bagina a kas maysa nga impeachment court tapno tamingen daytoy dagiti nadagsen nga alegasion (konta ken ni Duterte)."
Immanamong met ni 1-Rider Party-list Rep. Rodge Gutierrez ket kinunana a ti surbey ket "pudpudno a pakaanninawan" iti kapanunotan dagiti umili.
Kinuna met ni Lanao del Sur 1st district Rep. Zia Alonto Adiong a ti resulta ti surbey ket "validation" iti pagtaktakderan ti Kamara a nang-impeach iti bise presidente. (Joseph Pedrajas/MANILA BULLETIN)
