Impakaammo ti Philippine Red Cross (PRC) itay Peb. 17 a sisasagana daytoy a mangipaay iti dara a kasapulan dagiti pasiente nga apektaran ti sakit a dengue nga agraraira iti entero pagilian.
Kalpasan a nagdeklarar iti dengue outbreak ti Quezon City, pinatalgedan ti Department of Health (DOH) nga umad-adu ti kaso ti dengue ket mapanen a nasurok a 28,000 iti Pebrero.
Kinuna ni Richard Gordon, Chairman ken Chief Executive Officer (CEO) ti PRC, adda umdas a suplayda ti dara para kadagiti pasiente nga addaan iti dengue.
Ngem impaganetget ni Dr. Gwen Pang, Secretary-General ti PRC, ti pateg ti panangidonar iti dara ta adu ti agkasapulan bayat ti panagraira ti dengue.
Kas iti 'UniTeam,' ilunglungalong manen ni Marcos ti 'unity' dagiti lider tapno masolbar dagiti parikut ti Filipinas
Manipud Enero agingga iti ngalay ti Pebrero ita a tawen (2025), nabaelan ti PRC ti mangiruar iti 1,078 a yunit ti dara para kadagiti addaan iti dengue, ad-adu iti 106 manipud iti 524 a yunit ti dara idi 2024.
Manipud Enero agingga iti ngalay ti Pebrero ita a tawen, mapan a 360 a pasiente ti dengue ti napagserbian ti PRC, ad-adu iti 109 a porsiento ti bilang ti pasiente a naikkan iti dara ngem idi 2024.
Adda 102 a chapter ti PRC iti entero a pagilian, 108 a blood facility, 32 a blood center, 76 a collection station, ken 15 nga apheresis center. Mabalin nga awagan ti PRC iti numero 143 no kasapulan ti tulong iti dara wenno ania man nga emerhensia. (Merlina Hernando-Malipot/Manila Bulletin//Lito Hilidon/Bannawag)
