Kaligaguman ni kandidato a senador Camille Villar ti pannakaipasdek ti ad-adu pay a daycare center iti entero a pagilian tapno maipaayan dagiti agtrabtrabaho a nagannak iti nalaka ken asideg a pagadalan dagiti annakda. Itoy a wagas, maipasigurado a makapagadal dagiti babassit nga ubbing ket maisaganada iti masanguanan.
Ammo ni Villar nga umad-adu dagiti karit a sangsanguen dagiti pamilia a Filipino isu nga idagdagadagna ti panangidur-as ti gobierno iti panagpuonanna iti early childhood care and development (ECCD) wenno pannakataripato, pannakaisuro ken pannakaisagana dagiti babassit nga ubbing. Kunana a napateg daytoy nga addang kas tulong kadagiti nagannak ken annak.
Pannakaisaknap ti Childcare
Nakurang a PhP1-M a pondo, nailatang para iti Impeachment trial ti Senado
Inyunay-unay ni Villar no apay a kasapulan unay a mataming ti kinakurang dagiti daycare center, nangruna kadagiti komunidad kadagiti away ken kadagiti lugar a nababa ti matgedan dagiti tao a masansan a limitado wenno bassit ti daycare center. Adu a pamilia ditoy ti agpampannuray lattan kadagiti impormal a tulag wenno katulagan a saan a nainkalintegan; wenno mapilitanda a mangisakripisio iti trabahoda gapu iti kinaawan ti nalaka a daycare. Isu a gutgutigoten ni Villar dagiti gobierno lokal a mangipasdek ken pasayaatenda dagiti pasilidad ti daycare kadagiti bukodda a lugar ken siguraduenda a natalged ken mainumo dagitoy a pagadalan.
“Saan laeng a panangaywan kadagiti ubing ti ipapaay dagiti daycare center. Napateg ti akem dagitoy iti panagdur-as ti panagpanunot, pannakilangenlangen, ken karirikna ti ubing,” inlawlawag ni Villar. “Ipakita dagiti panagadal a ti nasapa a panagsursuro, pagbalinennaka a nalalaing iti benneg ti akademiko ken panagsapul iti kuarta.”
Ipagpaganetgetna pay ti kinapateg ti panangpasayaat iti panagsanay ken panangsueldo kadagiti daycare worker tapno masigurado nga agsagrap dagiti ubbing iti nangato ti kalidadna a pannakaaywan ken pannursuro.
Panangsuportar kadagiti Agtrabtrabaho a Nagannak ken Babbai
Malaksid iti childcare, impaganetget met ni Villar ti epekto ti pannakaisaknap ti childcare iti ekonomia, nangnangruna kadagiti agtrabtrabaho nga inna a masansan a marigatan a mangbingay iti panawenda iti panggedan ken iti pagrebbenganda iti pamilia. Patienna a ti panangpaadu iti daycare center, pagtalinaedenna ti ad-adu a babbai iti puersa dagiti mangmangged, nayonanna ti matgedan ti tunggal pamilia ken makatulong iti panagdur-as ti ekonomia.
“Adu a babbai ti agluslusulos iti trabahoda wenno kissayanda ti oras ti panagtrabahoda gapu ta awan ti childcare a madadaan a pagpilianda,” kinuna ni Villar. “Babaen ti pannakaisaknap dagiti serbisio ti daycare matulongantayo dagiti nagannak—nangruna dagiti inna—a mangituloy iti karerada, mangbangon kadagiti negosio, ken makatulong iti ekonomia a di maisakripisio ti pagimbagan dagiti annakda.”
Idagdagadag ni Villar ti public-private partnerships a wagas ti mangipasdek kadagiti daycare center kadagiti lugar nga asideg kadagiti pagtrabahuan ken komunidad tapno mapalakaan dagiti nagannak a mangbingay iti panawenda iti trabaho ken panangaywanda kadagiti ubbingda. Supsuportaranna pay ti panangited ti gobierno iti insentibo kadagiti negosio a mangipapaay kadagiti childcare services para kadagiti empleado.
Maysa a Kari iti Pamilia a Filipino
Kas paset ti platapormana, ipangpangruna ni Camille Villar dagiti polisia a mangpapigsa kadagiti sistema ti suporta iti pamilia. Ar-arapaapenna ti maysa a masakbayan a tunggal ubing makagun-od iti dekalidad a nasapa nga edukasion ken tunggal nagannak ket maaddaan kadagiti rekursos a kasapulan tapno maipaayna ti kasapulan ti pamiliana a di agdandanag.
“Karbengan dagiti annaktayo ti kasasayaatan a pangrugian iti biag, ket maikari dagiti nagannak a maipaayan iti pannulong tapno maipaayda daytoy iti anakda,” inggibus ni Villar. “Babaen ti panagipasdek kadagiti daycare center a nalaka a madanon ken makabaelan nga ibaklay, agpupuonantayo para iti napigpigsa, ad-adda nga inklusibo, ken narangrang-ay a masakbayan para iti Filipinas.”
