Maysa a lugar a makaay-ayo iti panagadal ti mangguyugoy kadagiti agtutubo tapno matagiragsakda ti proseso ti panagadal.
Daytoy ti kuna ni Camille Villar itay Pebrero 17 bayat ti pananginaugurarna iti maysa a Kabataan Center iti Barangay Pulang Lupa Dos iti Las Piñas City.
Kinuna ni Villar a gapu ta dagiti agtutubo ti baro a timek iti baro nga agsapa, masapul nga ikagumaan dagitoy ken ipasnekda ti agadal, kas panangigunamgunamna iti kinapateg ti kaadda ti aglawlaw a mamagbabalin iti panagadal kas naisangsangayan a padas.
Innayonna pay a segun iti panagadal, dakkel ti maitulong ti maysa nga aglawlaw a makaay-ayo iti panagadal a mangtignay kadagiti agtutubo nga agadal.
Kas iti 'UniTeam,' ilunglungalong manen ni Marcos ti 'unity' dagiti lider tapno masolbar dagiti parikut ti Filipinas
Agpaay pay a digital library wenno e-library, addaan daytoy de-air-con a Kabataan Center kadagiti kompiuter, printer ken photocopy machine para iti panagsukisok ken pag-print-an, ken libre a koneksion iti Wi-Fi a mangipaay kadagiti digital a rekursos para iti panagadal.
Addaan pay kadagiti libro, sanga-set nga encyclopedia, ken dadduma pay a digital a rekursos iti panagadal, ken espasio a mabalin a paguummongan dagiti ubbing ken pagadalanda a sangsangkamaysa.
Naisaad ti Kabataan Center nga aglawa iti 80-metro kuadrado iti akimbaba a kadsaaran ti Camella 3D multipurpose building iti Barangay Pulang Lupa Dos.
Kuna pay ni Villar a daytoy a panagbalbaliw ti kalikagumanna nga ibagian, a babaen ti baro a kita ti liderato, mairusat dagiti programa ken proyekto a mayannurot kadagiti agdama a kasapulan dagiti estudiante ken agad-adal, kas pangsurayna iti kunana a makatulong ti e-library kadagiti estudiante kadagiti aramidda iti eskuela.
Innayonna pay nga iti tunggal proyekto, panagsukisok, aramid iti eskuela a maileppas dagiti agtutubo iti Center, dakkel nga addang iti pannakagun-od dagiti arapaap dagitoy iti napimpintas a kita ti panagbiag para iti bukodda a bagi ken kadagiti pamiliada.
Dimmar-ay iti inaugurasion ti Kabataan Center da Barangay chairperson Julie Quines ken dagiti kagawad a da Erwin Manalili, Vilma de Castro, Jean Basa, Vilma Miranda, Rose Aguilar, ken Susan Borromeo; SK chairman Miko Manalili ken dagiti kagawad iti SK a da Ericka de Castro, Kaye Borres, Jaira Deiparine, Hilarrie Velasco ken Zelo Santos, SK Secretary Rovic Catoy ken SK Treasurer Francine Capistrano; ken Camella 3D Homeowners Association president Mark Tristan Cruz.
Naitalek ti Center kada SK chairman Manalili ken Camella 3D Homeowners Association president Cruz.
Daytoy Pulang Lupa Dos e-library ti maikadua a Kabataan Center nga impasdek ni Villar. Ti adda iti Barangay Pula Lupa Uno ti immuna.
Plano ni Villar a tuladen ti proyekto ken mangbangon ti ad-adu pay a Kabataan Center iti intero a pagilian kas pangtungpal iti adbokasiana a mangitandudo ken mangipaay kadagiti patas nga oportunidad iti edukasion kadagiti agtutubo.
Naipila ni Villar iti Kongreso ti House Bill No. 9572, wenno ti singasing nga “E-books for the Barangay Program Act,” a pakairamanan ti digital library platform a mangipaay iti natalged ken organisado a database dagiti digital learning resources.
Kas panggibus, kuna ni Villar a babaen dagiti Kabataan Center, matulongan dagiti agtutubo iti pagilian a maipasdek dagiti inanama ken arapaapda. Impanamnamana met nga agtultuloy nga agtrabaho tapno makaipaay kadagiti solusion kadagiti problema dagiti agtutubo, iti salun-at, iti pagbiagan ken trabaho, ken iti nakaparsuaan—maysa a baro a sirmata, baro a tignay, baro a diskarte para iti baro nga agsapa.
