Linawlawagan ti Philippine National Police (PNP) ti Nueva Vizcaya ti agwarwaras a damag nangruna iti social media maipapan kadagiti agraraira a "kumaw" wenno agal-ala iti ubbing iti nadumaduma nga ili iti probinsia.
Segun kadagiti maipaspaskil, maise-share, ken mapagpapatangan kadagiti group chat, agus-usar kano dagiti nasao nga agal-ala iti ubbing iti puraw ken nangisit a van a pangiluganan ken pangitalawda iti biktimada.
Impakaammo ti Nueva Vizcaya Police Provincial Office (NVPPO) a nagimbestigarda ket nakompirmar nga awan kinapudnona dagiti agwarwaras a damag gapu ta awan ti nairekord nga insidente wenno nai-report iti ania man nga istasion ti polisia iti probinsia maipapan kadagitoy a damag.
Segun iti NVPPO, "fake news" ti maiwarwaras nga impormasion maipapan kadagiti ubbing a mapukpukaw wenno nagistayan innala dagiti "kumaw."
'GUMIL Dan-ay 2: Aldaw ti Daniw Kailokuan,' angayen ti GUMIL Filipinas
Kinuna ni Police Colonel Jetopher D. Haloc, officer in charge ti NVPPO, a nanggubuay iti panagbubuteng ken panagdadanag dagiti nasao a damag nangruna kadagiti nagannak ket impasingkedna iti publiko nga agtultuloy ti PNP a mangtagtaginayon iti kinatalged ken kinaurnos iti probinsia.
Kiniddaw met ni PCol. Haloc iti publiko nga agridamda a kanayon ken i-report-da a dagus kadagiti autoridad no adda mapaliiwda a saan a maikanatad nga aktibidad.
