Ipatungpal ti Department of Education (DepEd) ti nabaliwan a kurikulum para iti Grado 11 ken 12, wenno ti Senior High School (SHS) Program iti daytoy umay nga School Year (SY) 2025-2026.
Segun ken ni Sekretario ti DepEd Sonny Angara, naannayas ti taray ti pannakabalbaliw ti kurikulum ti SHS iti naangay a DepEd Human Resource and Organizational Development (HROD) Convention iti Siudad ti Pasay itay Peb. 19.
Kinuna ni Angara a napintas ti panangawat dagiti pagadalan iti nabaliwan a kurikulum ta makissayan ti subject dagiti estudiante ken mannursuro.
Kinuna ni Angara a mangrugi ti pannakayimplementar ti nabaliwan nga SHS curriculum iti daytoy umay nga school year, ngem in-inut ti pannakaipatungpal daytoy, ta saan nga agpapada ti kabaelan dagiti pagadalan.
Kas iti 'UniTeam,' ilunglungalong manen ni Marcos ti 'unity' dagiti lider tapno masolbar dagiti parikut ti Filipinas
Innayon ni Angara nga ikkanda iti panawen dagiti pagadalan ta kaaduan kadakuada ti agkasapulan iti baro nga empleado ken agkasapulanda met iti panawen a mangisagana iti kurikulum.
Iti sabali a bangir, pinalagipan ni Angara dagiti pagadalan nga ingetanda koma ti panangipatungpal kadagiti pagalagadan mainaig iti graduation ken end-of-school-year rites, agraman ti “No Collection Policy” ti DepEd. (Merlina Hernando-Malipot/Manila Bulletin//Lito Hilidon/Bannawag)
