Mangilatang ti Senado iti nakurang a PhP1 a milion a pondo para iti panangpataray ti impeachment trial ni Bise Presidente (BP) Sara Duterte, a pakairamanan dagiti kasapulan a kas kadagiti identification card, roba nga aruaten dagiti Senador a kas ukom, ken legal fees, kinuna ni Senate President Francis Escudero itay Peb. 19.
Iti press conference a naangay iti Siudad ti Quezon, kinuna ni Escudero a dawatenda ti tulong ti maysa a law firm tapno mapapardas ti proseso, ken usarenda ti witness stand nga inusarda iti impeachment trial iti daydi dati a Chief Justice Renato Corona idi 2012.
Pinasingkedanna a nabiit pay a nangisayangkat dagiti empleado ti Senado iti pannakaipadas ti impeachment court tapno maammuanda dagiti masapul a mabaliwan, kas iti pannakaurnos dagiti mikropono, a maiduma iti urnos ti plenario, ken ti panangpabaro kadagiti audio line.
Malaksid iti daytoy, ilepleppasdan dagiti pagannurotan para kadagiti sangaili, tapno masigurado ti naannayas a panagtignay ti depensa ken prosekusion iti uneg ti Senado.
Kas iti 'UniTeam,' ilunglungalong manen ni Marcos ti 'unity' dagiti lider tapno masolbar dagiti parikut ti Filipinas
Iti laksid ti kinalatak ti kasasaad ti bista, impasigurado ni Escudero a makontrol dagiti gastos ti Senado.
Gapu ta sigurado itan ti pannakaangay ti impeachment trial, impaganetget ni Escudero nga ar-ramiden ti Senado ti amin a kabaelanda nga agsagana, uray naka-recess ti Kongreso. (Wilnard Bacelonia/PNA//Lito Hilidon/Bannawag)
