Sibubukel a sinurot ti Kamara ti Konstitusion iti panangidatagda iti impeachment complaint kontra ken ni Bise Presidente Sara Duterte--agraman dagiti articles of impeachment--iti Senado.
Dayta ti imbatad ni House Secretary General Reginald Velasco iti statement-na idi Pebrero 19.
"Sinigurado ti Kamara ti panagtungpal kadagiti amin a konstitusional a kasapulan idi impilada dagiti artikulo ti impeachment ken idi impatulodda iti Senado," kinuna ni Velasco kas reaksion iti pannakaipila ti dua a petision iti saklang ti Korte Suprema a mangkarkarit iti impeachment case.
Ni Velasco--ti kangatuan ti ranggona a civilian official iti Kamara--ti personal a a nangideliber iti Senado iti duly endorsed ken verified impeachment complaint kontra ken ni Duterte idi Pebrero 5.
Kas iti 'UniTeam,' ilunglungalong manen ni Marcos ti 'unity' dagiti lider tapno masolbar dagiti parikut ti Filipinas
"Pagaammomi ti dua a petision a naipila (iti Korte Suprema) a mangkarkarit iti kinabalido ken konstitusionalidad ti impeachment complaint a naipila ken naipatulod iti Senado," kinunana.
"Naammuanmi ti maipapan kadagiti petision babaen dagiti nadumaduma a media outlet. Gapu ta awan pay ti naawatmi a kopia ti ania man kadagitoy a petision, mapilitankami nga aguray agingga a maited kadakami dagiti kopia sakbay a sungbatanmi ti ania man a saludsod maipapan iti dayta a banag," innayonna.
Ni Duterte ti kaunaan a bise presidente nga in-impeach ti Kamara.
Naisayangkat ti direkta a pannakaipatulod ti impeachment complaint manipud iti Kamara iti Senado idi nasurok a kakatlo kadagiti agdama a kameng ti Kamara (215 manipud iti 306) ti nagpirma iti reklamo.
Kabayatanna, kinuna ni San Juan City Lone District Rep. Ysabel Maria Zamora--maysa kadagiti 11 a kameng ti Kamara a napusgan kas prosecutor iti masungad nga impeachment trial iti Senado--nga umdasen ti body of evidence a mangipatalged iti pannakaikkat ni Duterte iti puestona ken ti agnanayon a pannakadiskualipikar daytoy nga agtakem iti ania man a public position.
Dagiti innem a kangrunaan nga alegasion a linaon ti pito nga artikulo ti impeachment kontra ken ni Duterte ket panagkokomplot a mangpapatay ken ni Presidente Marcos; malversation ti ₱612.5 a milion a kompidensial a pondo; panagpasuksok ken panagkunniber iti Departamento ti Edukasion; di mailawlawag a kinabaknang ken di panangipalgak kadagiti sanikua; pannakairaman kadagiti extrajudicial killing (Davao Death Squad); ken destabilization, insurrection, ken panangriribuk iti publiko. (Ellson Quismorio/MANILA BULLETIN)
