Panggep dagiti opisial ti Barangay Matandang Balara, maysa nga eksklusibo a subdibision iti Quezon City ti agibulos manen kadagiti tukak a mangtiliw ken mangalun-on kadagiti lamok nga agiwarwaras iti dengue kalpasan ti deklarasion ti panagraira ti dengue itoy a siudad.
Indeklarar ni Mayor Joy Belmonte ti dengue outbreak idi Pebrero 15.
Addan nairekord a 45 a kaso ti dengue iti Barangay Matandang Balara.
“Inaramidmi dayta idin ket agpayso a bimmaba dagiti kaso ti dengue," kinuna ni Barangay Chairman Allan Franza iti maysa nga interbiu.
Kas iti 'UniTeam,' ilunglungalong manen ni Marcos ti 'unity' dagiti lider tapno masolbar dagiti parikut ti Filipinas
"Patienmi a dakkel latta ti maitulong dagiti tukak, nangruna kadagiti bakante a lote a saan a mastrek tapno madalusan," innayonna.
Idi 2018 ken 2019, nagibulos ti barangay kadagiti tukak kalpasan a nairekord ti dua a natay ken nasurok a 200 a kaso ti dengue.
Nupay kasta, saan a nakombinsir dagiti maseknan iti Department of Environment and Natural Resources (DENR) ken Department of Health (DOH) iti daytoy a wagas ti panangkissay kadagiti kaso ti dengue. Dinakamatda iti kinakurang ti panagadal tapno mapaneknekan nga epektibo a solusion daytoy.
Kinuna ni Franza nga agtultuloy ti panangisayangkatda iti clean-up drive ken information dissemination.
“Surotenmi ti 5S strategy ti DOH,” kinunana.
Ti panagusar kadagiti tukak, siguro ket maudi daytan a panglakagantayo no saantayo a mapasardeng ti panagwaras ti dengue,” innayonna. (Allysa Nievera)
