Kas iti panagkampaniada idi iti "UniTeam," ti aliansa a binukel da Presidente Marcos ken Bise Presidente Sara Duterte para iti eleksion idi 2022, ilunglungalong manen ni Marcos ti "unity" wenno panagkaykaysa iti pannasolbar kadagiti parikut ti pagilian, kabayatan ti panangyendorsona kadagiti manokna a para senador iti rali ti Alyansa para sa Bagong Pilipinas (Alyansa) iti Siudad ti Dumaguete, Negros Oriental idi rabii ti Huebes, Peb. 20.
Ingganetget ni Marcos nga imet ti Alyansa ti isu met laeng a prinsipio nga inadaptarda ken ti dati a kaaliadona a ni Duterte iti napalabas nga eleksion--ti "unity" dagiti nadumaduma a politikal nga aliansa.
Nagtaray ni Marcos iti sidong ti Partido Federal ng Pilipinas, idinto a ti met Hugpong ng Pagbabago ken ni Duterte. Karaman dagiti partidoda kadagiti grupo iti pagilian a nangbukel iti maysa nga aliansa para iti eleksion idi 2022.
Imbitlana kadagiti dimmar-ay iti rali iti Dumaguete nga immanamong dagiti kandidato iti sidong ti Alyansa a makikadua iti aliansa ta mamati dagitoy a makatulong ti panagkaykaysa a mangrisut kadagiti parikut ti pagilian.
Panagangkat iti 25,000 a tonelada nga ikan, inaprobaran ti DA
"Immannugotda amin nga agkaykaysa gapu ta maawatanda a ti laeng solusion kadagiti parikut ti pagilian ket unity," kinuna ni Marcos.
Imbatad daytoy ni Marcos kalpasan nga inulitna dagiti nadumaduma nga aramid ken ugali a saanto nga aramiden dagiti kandidatona tapno masolbar ti dagiti parikut a kas iti ilegal a droga, kriminalidad, pangta iti teritorio ti pagilian, ken kaawan panggedan.
Kas kadagiti imbagana kadagiti napalabas a rali, kinuna ni Marcos a saan nga agpannuray iti nadara nga operasion dagiti manokna a para senador tapno mataming laeng ti parikut iti droga iti pagilian. Kasta met a saan nga isuko dagiti para senadorna ti uray maysa a pulgada ti teritorio ti pagilian ken salaknibanda ti interes ti pagilian.
Innayonna a saan nga anamongan dagiti para senadorna dagiti operasion ti Philippine Offshore Gaming Operators (POGO) tapno mapaadu dagiti panggedan.
Buklen ti Alyansa ti lima a partido politikal: ti Partido Federal ng Pilipinas (PFP), Lakas-Christian Muslim Democrats (CMD), Nationalist People’s Coalition (NPC), Nacionalista Party (NP), ken National Unity Party (NUP). (Betheena Unite/MANILA BULLETIN)
